DILI, STLTIMORLESTE.com – Deputadu Bankada Partidu Kongresu Nasional Rekunstrusaun Timor (CNRT), Mateus da Cruz de Carvalho husu Governu liu husi Ministeriu Obras Publikas (MOP) atu konstrui ponte Beasu, iha Munisipiu Vikeke neebe kotu kleur ona no impede movimentasaun populasaun sira nian.
“Hau hanoin katak ponte Beasu nee kotu kleur ona, ami liu iha neeba dala hira ona, maibe liu la diak, liu husi mota laran deit, satan udan hanesan nee prezudika tebes movimentasaun populasaun sira nian,” hatete deputadu Mateus da Cruz ba STL iha resintu parlamentu nasional, Kinta (22/01/2026).
Nia dehan, ponte nee kotu kleur ona, durante nee prezudika tebes movimentasaun populasaun sira nia viajen husi Vikeke Vila ba Postu Uatulari too Uatokarbau liu-liu iha tempu udan tanba mota, nunee labele ultrapasa husi fatin nee.
Tanba nee nia husu Governu liu husi Ministeriu Obras Publikas atu tau orsamentu hodi halo konstrusaun ba ponte Beasu nee, tanba dezde ponte kotu iha tinan hirak liu ba too agora Governu seidauk tau prioridade atu konstrui ponte nee.
“Hau sei foti kestaun nee iha plenaria Parlamentu Nasional no husu Ministru Obras Publikas atu tau atensaun ba ponte nee, tanba ponte nee kotu kleur ona maibe seidauk konstrui foun fali,” adianta nia.
Nia mos reforsa, iha Munisipiu Vikeke nee Ponte Beasu kotu, maibe estrada hahu kedas husi Asalaitula too Ossu Vila, estrada Dilor, iha Beoli, Postu Uatolari no Uatokarbau.
“Ita foti kestaun nee dala hira ona maibe la hatene Ministru Obras Publikas nee rona povu sira nia preokupasaun ga lae? Ita la hatene,” hakotu nia
Entretantu ponte Beasu rasik kotu iha tinan hirak liu ba tanba hetan sobu husi inundasaun.
(alb)
