DILI, STLTIMORLESTE.com – Bainhira infraestrutura neebe sai hanesan moris fatin ba ekonomia no sosial tohar ka naksobu, komunidade iha area remotas mak sai vitima primeiru. Kazu ponte tohar neebe akontese iha munisipiu balu foin lalais nee, laos deit hamosu dezafiu teknika, maibe hamate atividade loron-loron povu nian.
Iha aldeia barak, ponte mak ligasaun uniku ba sidade, bainhira ponte nee monu ka naksobu komunidade labele asesu ba saude hanesan ambulansia labele tama atu foti pasiente grave ka inan isin rua neebe atu tuur ahi, agirkultor sira nia produtu hanesan fehuk, aifarina modo no seluk tan dodok deit iha foho, tanba kareta labele tula ba merkadu sidade, nunee mos labarik sira tenke para eskola tempu provizoriu ka foti risku hodi hakat mota neebe bee sulin makaas.
Observador Politika, Domingos de Carvaho nia haree problema nee mosu tanba kualidade kontrusaun neebe la tuir padraun no fakta manutensaun husi parte relevante. ”Ita haree projetu barak halo deit hodi gasta orsamentu, maibe la hanoin ba tempu naruk, bainhira udan boot oituan deit ponte naksobu ka tohar ona,” kestiona Observador Politika nee ba STL iha nia hela fatin, Delta, Tersa (24/03/2026).
Tanba tuir nia, povu iha area rural la presiza estudu viabilidade neebe naruk, sira presiza solusaun pratika. Governu liu husi Ministeriu Obras Publika (MOP) presiza halo ponte provizoriu hodi asegura movimentu povu nian la para total no foti responsabilidade ba kompanhia neebe halo servisu la ho kualidade.
Entretantu Akademsita UNPAZ, Jose Xavier husu ba Ministeriu Obras Publika atu keta hein too tinan foun foin ba haree ponte sira neebe tohar iha munisipiu sira. ”Ita nia povu presiza solusaun agora, laos deit promete neebe la iha rezultadu,” dehan Jose.
(car)
