DILI, STLTIMORLESTE.com – Populasaun hamutuk 205 iha Suku Lavateri, Postu Administrativu Baguia, Munisipiu Baukau, dezde ukun aan too ohin loron nafatin moris iha nakukun laran, tanba seidauk asesu ba iha linha eletrisidade.
Iha Suku Lavateri kompostu husi aldeia lima mak hanesan Aldeia Wabubu, Aldeia Ledana, Aldeia Ossoisilari, Aldeia Onortibalari no Aldeia Fanalolo, maibe iha populasaun barak mak sei moris iha nakukun laran.
Xefe Suku Lavateri Domingos da Costa Pereira dehan, antes nee komunidade neebe mak seidauk asesu ba linha eletrisidade hamutuk 165 inklui balun hetan ona, maibe iha komunidade balun uza rasik sira nia fiu, maibe foin lalais iha mudansa oituan, nunee populasaun hamutuk 205 seidauk asesu eletrisidade
“Komunidade iha aldeia lima, maibe ami seidauk defini aldeia hira mak seidauk asesu ba eletrisidade, maibe iha jeralmente total populasaun hamutuk 205 mak seidauk asesu ba iha linha eletrisidade,” dehan Domingos ba jornalista STL liu husi telefone, Segunda nee (21/04/2025).
Nia akresenta, populasaun neebe iha estrada boot deit mak asesu ona ba linha eletrisidade tuir besi riin neebe mak tidin tuir estrada publiku, maibe iha komunidade balun neebe mak iha kbiit sosa rasik fiu hodi dada ahi.
“Foin daudaun husi parte EDTL ba monta ona prepago maibe sira monta mak ida besik estrada publiku nee, ida fora husi estrada balun iha inisiativa rasik uza sira nia fiu hodi dada ahi, tanba ai riin laiha, ho razaun ida nee mak sira seidauk monta prepago, maibe wainhira iha ona ai riin hakarak ka lakohi tenke monta hotu prepago, iha tinan 2022 husi parte EDTL mai halo ona survei maibe foin lalais Governu troka malu entaun para tiha,” nia tenik.
Xefe Suku nee relata, foin lalais nee haruka fali ona proposta ida ba Eletrisidade Timor Leste, Empreza Publiku (EDTL) no Ministeriu Obras Publiku (MOP) maibe seidauk iha resposta,” katak nia.
Iha fatin hanesan, Komunidade Marcos Ximenes haktuir, maske ukun aan tinan 24 ona maibe populasaun sira barak mak seidauk asesu ba linha eletrisidade, nafatin tuur iha nakukun laran iha tempu kalan.
“Ami hakarak mak eletrisidade, bee moos no saude, uluk kedas dezde ukun aan too agora seidauk asesu ba eletrisidade, nuudar komunidade ami nia aspirasaun mak ida nee, tanba durante ukun aan too agora ami nafatin tuur iha nakukun laran, nee orsida ema dehan balun mak ukun aan maibe balun seidauk ukun aan, sira ida besik estrada nee mak ukun aan, maibe iha area rurais nee nafatin tur iha nakukun laran,” dehan Marcos.
Entretantu iha Suku Lavateri total populasaun hamutuk 2.480, kompsotu husu aldeia lima mak hanesan Aldeia Ledana, Aldeia Osso isilari, Aldeia Onortibalari, Aldeia Ledana no Aldeia Uabubu.
(EST 2)
