DILI, STLTIMORLESTE.com – Populasaun Aldeia 30 Agostu, Postu Administrativu Dom Aleixo, Munisípiu Dili, keixa tekniku Eletrisidade Timor Leste Empreza Publika (EDTL.EP) ba Parlamentu Nasional, tanba ahi mate loron tolu ona maibe tekniku sira la ba halo manutensaun ba linha eletrisidade.
Tuir Populasaun Aldeia 30 Agostu, Adão Ximenes katak, nia deside keixa EDTL.EP ba Parlamentu Nasional tanba ahi mate durante loron tolu ona, maibe tekniku sira la ba halo manutensaun ba linha eletrisidade.
“Horiseik hau ba edifisiu EDTL.EP, hau hakerek hau nia naran no numeru telefone no hatoo preokupasaun kona-ba eletrisidade, no sira husu fatin iha neebe, hau dehan iha Aldeia 30 Agostu Malinamuk nian, entaun sira dehan ita boot ba hein iha neeba, depois ami haruka tekniku ba halo manutensaun ba linha eletrisidade, maibe hein sira la ba ida,” hatete Adão Ximenes ba jornalista sira iha resintu Parlamentu Nasional, Kuarta (12/02/2025).
Nia hatutan, deside mai iha Parlamentu Nasional nee hakarak hasoru deputadu sira no husu atu hasai tiha linha eletrisidade neebe iha, tanba populasaun uma kain 10 iha Aldeia 30 Agostu la merese atu asesu ba eletrisidade.
“Ami povu kuandu ahi mate nee mai hatoo ami nia preokupasaun ba EDTL.EP atu ba hadia no se pulsa mak la iha, ami kada fulan ami sosa pulsa nafatin, hau ho sira EDTL.EP la iha problema ruma, hau hakarak husu deit tanba saida mak sira la ba hadia eletrisidade, osan mak la iha ga ou Parlamentu Nasional mak la aprova osan atu aloka ba EDTL.EP mak la iha ga oinsa,” dehan nia.
Nia akresenta liu tan katak, durante loron tolu ahi mate nee prezudika atividade uma laran, tanba nee sira buka meus, tanba labarik labele estuda no prepara ai-haan ba labarik sira.
“Ami tau kalen depois ami tein iha leten, tanba durante nee ami uza deit rice cooker, nomos klaru katak kuandu ahi mate labarik sira labele estuda,” hatete nia.
(alb)
