ATAURO, STLTIMORLESTE.com – Populasaun husi Postu Administrativu Atauro tinan ida nee goza ona estrada ho alkatraun husi dalan protokulu hahu husi Beloi too Bikeli.
Kestaun nee hatoo husi Prezidente Autoridade Administrativa Atauro, Mateus Belo ba jornalista iha Beloi, Tersa (17/03/2026).
Nia hatete, kona-ba infraestrutura baziku Atauro ba aldeia sira hotu, ba tinan ida nee garante iha konetividade ona, laiha aldeia neebe izoladu, no sei loke hotu estrada.
Balun neebe loke hela, nafatin kontinua halo planu cor, ba area rural sira agora daudauk nee mudansa ona kompara ho tempu sira uluk neebe estrada aat.
“Atauro ba tinan ida nee ita goza ona alkatraun, ba dalan protokolu husi Villa ba Beloi, too ba Bikeli tinan ida nee ita bele goza ona,” dehan Prezidente Autoridade Administrativa Atauro, Mateus Belo.
Prezidente Autoridade haktuir, alende nee eletrisidade hela aldeia tolu, hanesan aldeia Berahu, Adara Atikuru, Maker, no komitmentu tinan ida nee tenke halo remata. komunidade aldeia hotu-hotu bele asesu ona lina eletrisidade.
Aleinde nee, ba bee moos, nuudar Prezidente Autoridade Administrativa esforsu hela, nunee iha bele garante bee moos ba ita nia komunidade.
Nia akresenta, liu-liu ba eletrisidade nee tinan ida nee governu halo levantamentu liu-liu estudu viabilidade atu installa solar boot iha Atauro ho kapasidade boot. Nunee, labele depedensia ba kombutivel deit, maibe bele fornese enerjia oras 24 ho instalasaun solar. Tanba hatene katak, mobilizasaun kombutivel mak too iha nee kustu boot tebe-tebes.
“Ita aluga roo deit kombutivel mai Atauro nia kustu US$ 8 mil dala ida deit, fulan ida nee dala rua entaun bele mobiliza dala rua. Entaun kustu boot ba kombutivel, kustu boot mos ba transporte mobiliza, entaun governu sentral esforsu ona nunee tinan ida nee ita bele instala ona solar boot iha Atauro, solar painel ba enerjia renovavel iha Atauro,” nia hatutan.
Entretantu, total populasaun 12.545 abitantes iha suku lima kompostu husi Suku Beloi, Bikeli, Makadadi, Makili no Maumeta.
(eme)
