DILI, STLTIMORLESTE.com – Populasaun sira husi Postu Administrativu Uatulari no Postu Uatukarbau, Munisipiu Vikeke husu Institutu Jestaun Ekipamentu Apoiu Dezenvolvimentu Infraestrutura (IGEADI) atu normaliza lalais estrada diresaun husi Vikeke Vila too Postu Uatukarbau.
Kestaun nee Deputadu Bankada Partidu CNRT, Anacleto Freitas levanta liu husi plenaria PN, Segunda (09/03/2026).
“Foin lalais iha loron 6 Marsu, hau ba halo fiskalizasaun iha Postu Administrativu Uatulari no Postu Uatokarbau, populasaun sira husu Prezidente IGEADI labele halo deit normalizasaun ba estrada iha Asailatula deit, maibe normaliza mos estrada Diresaun Vikeke Vila too postu Uatulari no Postu Uatukarbau,” rekomenda Deputadu Anacleto Freitas.
Nia dehan, MOP ho IGEADI presiza tau atensaun ba pedidu husi populasaun sira nian tanba tinan barak ona populasaun sira husu atu reabilita estrada nee maibe governu seidauk tau atensaun.
Tan nee nia husu IGEADI atu mobiliza lalais ekipamentu pezadu ba Munisipiu Vikeke hodi normaliza lalais iha fatin refere hodi garante populasaun sira nia movimentasaun.
“Estrada iha fatin nee grave los ona presiza normaliza nunee populasaun sira bele lao ba mai ho diak,” dehan nia.
Iha fatin hanesan, Deputadu Bankada Partidu FRETILIN, Dario Madeira mos aseita ho deklarasaun Deputadu Bankada Partidu CNRT, Ancleto Freitas neebe husu IGEADI atu normaliza lalais estrada diresaun Vikeke Vila too Postu Administrativu Uatukarbau.
“Hau aseita Deputadu Anacleto nian, tanba kondisaun estrada Vikeke Vila too Uatulari nee presiza governu liu husi MOP no IGEADI presiza tau atensaun lalais ba estrada nee, tanba estrada nee grave los ona hanesan tiha karau nia dalan,” dehan nia.
Deputadu Dario mos kestiona kapasidade PAM Vikeke neebe lidera munisipiu nee kleur ona maibe nunka tau atensaun ba infraestrutura.
“PAM Vikeke, ita ba atu servi povu Vikeke, laos ba tau aan hanesan liurai ba povu Vikeke, neebe povu mak atu servi fali ita, nesesidade bazika sira hanesan nee PAM Viqueque kuaze tinan barak ona la tau atensaun ba ida nee,” dehan nia.
(alb)
