DILI, STLTIMORLESTE.com – Governu Portugal liu husi Instituto Camões apoiu orsamentu rihun US$ 140 ba Ministeriu Edukasaun (ME), hodi reabilita Eskola Ensinu Baziku Farol (EBF).
Prezidente Republika Jose (PR), Ramos Horta ba jornalista sira, bainhira remata partisipa asina memorandu entre Instituto Camões no Ministeriu Edukasaun, iha EBF Farol, Dili, Kinta (03/04/2025) hatete, ohin Prezidente Republika asiste serimonia asinatura kooperasaun entre Ministra Edukasaun ho Embaixadora Portugal iha Timor Leste, oinsa bele servisu hamutuk atu halo reabilitasaun ba eskola EBF neebe apoiu orsamentu husi Governu Portugal.
“Ohin hau mai iha nee hamutuk ho Ministra Edukasaun, Dulce ho Embaixadora partisipa serimonia asinatura kooperasaun entre Instituto Camões ho Ministeriu Edukasaun, no Portugal tau osan rihun US$ 140 hodi reablita sala hitu iha nee,” dehan PR, Horta.
Prezidente Republika dehan, eskola nee antigu, hahu kedas iha tempu Português 1972, tinan neebe Embaixadora Portugal iha Timor Leste moris. Estudante rihun rua (2000) eskola iha EBC Farol, eskola ida ke boot infraestrutura diak no barak presiza hadia.
Iha fatin hanesan, Ministra Edukasaun, Dulce de Jesus Soarea hatoo agradese ba Prezidente Republika neebe sempre akompanha servisu Ministeriu Edukasaun nia, liu husi servisu Prezidente nia bele hetan mos apoiu sira nomos ho Primeiru Ministru.
Aleinde nee Ministra Edukasaun mos hatoo agradese ba Governu Portugal, liu husi Embaixador Portugal no Instituto Camões neebe apoiu orsamentu hodi reabilita Eskola EBC Farol.
“Ita lori estudante timorense ho profesores sira hotu agradese ba Instituto Camões liu husi Embaixada Portugal iha Timor Leste neebe mak fo apoiu ba ita halo reabilitasaun ba sala de aula eskola Farol, kuandu ita hetan apoiu sira hanesan nee ita agradese bele hamenus liu tan ita nia problema, tanba ita presiza US$ 1.900, sala de aula se iha ema ruma ka doador ajuda ita tenke agradese nomos ita kuidadu fasilidade sira nee, atu nunee fasilidade sira nee bele uza ba aprendizajen ho diak,” katak ME, Dulce.
Nunee mos Embaixadora Portugal iha Timor Leste, Manuela Bairos sente kontente bele atinji objetivu, tanba antes nee iha hanoin atu reabilita Eskola EBC Farol, maibe agradese ohin bele realiza liu husi asina memorandu.
“Sente kontente ohin asina memorandum entre Ministeriu Edukasaun Timor Leste ho Instituto Camões hodi reablita sala hitu iha Eskola Farol, eskola nee harii iha tinan 1972 eskola neebe antigu, neebe produs estudante lubuk nomos profesores lubuk,” katak Embaixadora.
Nia hatete, orsamentu neebe mak apoiu husi Governu Portugal liu husi Instituto Camões apoiu ba Ministeriu Edukasaun, hodi halo reabilitasaun sala de aula 7 iha Eskola EBF Farol.
(eme)
