DILI, STLTIMORLESTE.com – Prezidente Republika (PR), José Ramos Horta hatete, Portugal sei investe milhaun US$ 70 iha Timor Leste (TL), hodi ajuda iha area Edukasaun no Justisa.
Prezidente Republika, Jose Ramos Horta hatoo kestaun nee ba jornalista sira, bainhira remata vizita ba Portugal no fila hikas mai iha Timor Leste, iha Aeroportu Internasional Nicolau Lobato, Díli, Tersa (29/10/2024).
Nia dehan, Primeiru Ministru Kay Rala Xanana Gusmão ba ona Portugal no halo akordu ho Portugal atu investe milhaun US$ 70 ajuda mai Timor, iha area edukasaun no justisa nian.
Xefe Estadu halo rezumu nia viajen hatete, vizita nee privadu, uma nain sira mak konvida konferensia Estoril, konferensia nee hanesan instituisaun ida, munisípiu turizmu mak tinan-tinan ho universidade boot sidade Nova Portugal nian mak organiza, sira mak selu viajen, hotel, viajen nee 100% privadu.
Nia ba Portugal hasoru oituan ho Prezidente Portugal, Marcelo Rebelo de Sousa, halo enkontru barak maibe enkontru sira nee natureza privadu. No ultimu iha Portu ba simu premiu guerra João Querro, premiu literariu konesidu iha Portugal, sira tinan ida fo premiu ba PR Horta tanba nee mak PR Horta ba laiha enkontru ruma neebe bele hatete ho setor emprezarial ka setor privadu sira.
“Antes hau ba ita boot sira hatene, Primeiru Ministru ba iha neeba halo akordu ho Portugal, akordu neebe diak Portugal atu investe milhaun US$ 70 ajuda mai Timor nee kompetensia governu nian mak haree took Portugal area saida, maibe area baibain numeru ida ba Portugal iha Timor Leste area numeru ida mak edukasaun, ida fali mak justisa,” dehan PR, Horta.
Xefe Estadu hatete, diplomasia iha Prezidente Republika nia mandatu tau matan ba diplomasia signifika Timor Leste, marka prezensa iha forma internasional lubun boot sira Timor tau nia opiniaun.
Horta intervensaun koalia konaba Timor Leste situasaun atual maibe hotu-hotu hatene ona pozitivu liu-liu husi amu Papa Francisco ninia vizita sira hotu-hotu akompanha.
“Ema neebe hau hasoru iha neeba informal ka formal sira hotu-hotu hatete, ami akompanha vizita amu Papa Francisco nian ami hotu-hotu kontente ami haree lao diak tebes-tebes,” katak Xefe Estadu.
(eme)
