DILI, STLTIMORLESTE.com – Jogu final husi Modalidade Voli Praia Mista, Portugal hasoru Timor Leste, iha ambitu Jogus Desportu Comunidade dos Países de Língua Portuguesa (CPLP) ba dala XII iha Nasaun Timor Leste (TL) 2025, ekipa jogadores mista husi Portugal hetan votoria hafoin halakon ninia adversariu husi ekipa TL ho set rua (2-0) iha kampu Praia Lecidere, Dili.
Iha set primeiru, Portugal joga iha dominasaun total no remata set primeiru ho pontus 21 no TL halibur deit pontus 12.
Hafoin tempu remata, kontinua tan iha skore set Segundu, ekipa rua lansa atake bola hakat liu redi Voleibol Praia, ekipa mista husi portugal maka hetan uluk pontus too 5, responde kedan husi ekipa mista Voleibol Praia TL, nunee pontu TL sae ba 5-1 pontu. Jogu kontinua lao, derpenti deit jogador mista husi TL ho numeru farda 1 ho naran Noel Sequeira soe aan atu salva bola iha nia kampu ba kampu adversariu Portugal, silu aan iha kampu laran ain kona kaimbra, nunee monu fatin, tanba nee ekipa juri foti desizaun hapara jogu kuaze 5 menutu maka foin kontinua joga maibe ladun fo iha performance neebe diak ona iha skore set Segundu.
Maske ain moras, maibe Noe ho nia par husi TL, nafatin esforsu aan atu kontra ninia adversariu iha kampu voleibol Praia Tasi ibun lecidere Dili, too ekipa Portugal konsege hetan vitoria ho pontu 21 no TL hetan pontu 16 iha Kampu Volibol Praia Mista, Largo Lecidere, Kuarta (24/07/2025).
Husi jogu mista Voleibol Praia nee iha final, entre TL ho Portugal, rezultadu Portugal konkista vitoria ho determinasaun primeiru lugar, iha modalidade voleibol praia mista jogu desportivu CPLP ba dala XII tiinan 2025 neebe realiza iha TL.
Tuir jogador Mista Portugal Filipe Neto hoMatilda da Silva ba STL iha kampu praia Lecidere Dili, Kinta (24/7/2025) katak, sente kontente tanba liu husi jogus Desportivu CPLP tinan 2025, ekipa mista portugal sai primeiru lugar hafoin halaok sira nia adversariu husi TL.
“Hau haree, ekipa Voleibol Praia TL mista, joga diak maka ohin ami hasoru malu iha final, normalmente iha jogu, ida tenke lakon no ida tenke manan. Hau agradese ba buat hotu neebe governu no povu TL fo ba ami, liu-liu atendementu lao kapas tebes, espera katak iha futuru nafatin realiza jogus desportu CPLP atu hametin diak liu tan joventude no povu nasaun CPLP iha fraternidade no kultura,” dehan nia.
Iha oportunidade hanesan jogador Voleibol Praia TL, Noel Sequeira agradese ba Federasaun nasional Voleibol Praia TL tanba eventu internasional jogus desportivus CPLP neebe realiza iha nasaun TL konsege hakat ba segundu lugar.
“Hau husu deskulpa ba povu TL no Governu tanba ami nain rua nia mehi atu oferese medalha osan mean ba Nasaun TL, la atinji maibe ami ho esforsu aan, konsege tama iha final no hetan deit segundu lugar,” dehan nia.
(jos)
