BAUKAU, STLTIMORLESTE.com – Komisaun Organizadora ba selebrasaun loron nasional juventude ba dala 20 no komemorasaun masakre santa kruz ba dala 34, iha Postu Administrativu Baukau Vila realiza seminariu.
Informasaun nee hatoo husi Prezidente Komisaun Organizadora selebrasaun 12 Novembru iha Postu Administrativu Baukau Vila, Manuel Camilo Pires ba jornalista sira iha salaun apuramentu Vila Nova Baukau, Tersa (11/11/2025).
“Atividade primeiru ami realiza limpeza jeral iha estrada publiku sira, segundu ami halo seminariu involve estudante sira husi eskola sekundaria 7,” dehan Manuel.
Prezidente nee informa, estudante sira neebe partisipasi iha seminariu refere husi eskola Ensinu Sekundaria Jeral 01 Tirilolo, 02 Jeral Vila Nova, Kafe Baukau, Santo Antonio Teulale, ETI, SACROJES no Tekniku Vokasional Vila Nova.
Nia sublina, seminariu refere aprezenta materia kona-ba enpodera jovem sira iha prosesu dezenvolvimentu no istoria luta libertasaun nasional, liu liu akontesementu trajedia iha loron 12 Novembru 1991.
“Ita presiza reflete istoria nee iha seminariu refere, tanba loron nee importante no istoria ida prezisa memorializa fila fali ba iha juventude sira, prezisa hatene katak prosesu luta libertasaun mos envolve jovem sira mak hetan rezultadu indepedensia,” Manuel fundamenta.
Prezidente nee akresenta, relasiona realiza seminariu refere ho materia importante husi akontesementu trajedia masakre santa krus, atu hafanu hikas jovem foinsae sira atu banati tuir hahalok jovem rezistensia sira nian neebe sakrifika aan too Timor hetan independensia.
Tanba nee seminariu refere foti materia husi akontesementu sira no intrudus ba jovem foinsae sira, atu banati tuir hahalok jovem rezistensia sira nian iha prosesu ukun aan nee.
Tuir partisipasaun estudante husi eskola sekundaria Katolika Sagrada Coração de Jesus (SACROJES) Vila Nova Baukau, Celma do Rosário da Costa Silva katak, seminariu refere parte orador sira esplika liu, kona-ba edukasaun sivika no trajedia masakre santa kruz nian.
“Seminariu nee mos orador sira konta istoria pasadu nian kona-ba 12 Novembru, hahu husi tempu neebe ema kaer Sebastião Gomes too nia mate hafoin akontese masakre santa kruz,” Celma haktuir.
Nia argumenta, durante seminariu orador sira konta istoria pasadu liu liu 12 Novembru 1991 trajedia masakre santa kruz, mezmu la partisipa iha momentu neeba, maibe rona ho laran triste, tanba Timor-Leste nia ukun aan, kontribui mos husi jovem rezistensia sira no seluk tan nia luta too balu lokon vida iha funu laran.
Nunee refleta ba pasadu hanesan jerasaun kontinuador sei luta hodi kontribui iha prosesu dezenvolvimentu, tanba Timor Oan barak mate ba ukun no iha faze ukun aan hakarak kria pas no estabilidade.
Entretantu seminariu refere hetan partisipasaun masimu husi estudante sira no orador husi ekipa Ministeriu Juventude Desportu Arte no Kultura, parte relijiozu no reprezentante Prezidente Autoridade Munisipiu Baukau.
Jornalista: Tomas Reis
Editora: Carme Ximenes
