BAUKAU, STLTIMORLESTE.com – Postu Saude hamutuk 5 iha Munisipiu Baukau durante nee laiha mediku hodi fo asistensia saude ba komunidade sira neebe konsulta moras.
Diretor Servisu Munisipal Saude Baukau, Cristiano Cipriano Belo relata, fasilidade saude neebe eziste iha Munisipiu Baukau kompostu Sentru Saude 9 no Postu Saude 30, maibe Postu Saude 5 seluk durante nee infrenta problema pesoal saude, tanba laiha mediku.
“Agora daudaun iha Servisu Munisipal Saude ligadu mediku iha Postu Saude balun seidauk eziste,” Cristiano hateten, iha knaar fatin Tirilolo, Baukau, Kinta (09/10/2025).
Nia sublina, Postu Saude neebe seidauk iha mediku mak hanesan, Postu Saude Uaigae iha Postu Administrativu Vemasi, Postu Saude Lelalai no Laisorulai iha Postu Matebian, Postu Saude Larisula no Postu Saude Osso-Huna iha Postu Baguia.
Mezmu Postu Saude 5 refere seidauk iha mediku, maibe iha pesoal saude sira hanesan emfremeiru, emfremeira, parteira neebe durante nee fo atendimentu saude ba komunidade sira iha baze.
“Maske falta mediku maibe servisu saude kuidadu primariu lao nafatin, ita atu hateten iha nee katak tansa saida Postu Saude laiha mediku, tanba bainhira vaga neebe loke husi nivel sentrais mediku Timor Oan atu tuir vaga nee mak laiha nunee labele kolola mai,” Cristiano argumentu .
Iha sorin seluk Xefe Suku Uaigae Gaudensio C. Soares katak, daudaun Postu Suade Uaigae laiha, maibe la fo impaktu ba atendimentu saude ba komunidade sira iha Suku Uaigae, tanba iha emfremeira no parteira neebe daudaun fo asistensia saude ba komunidade sira neebe presiza.
“Ita koalia kona-ba moras espesifiku nee sempre iha impaktu, maibe kona-ba atendimentu baibain nee diak, maibe prezisa atendimentu mediku nee laiha,” Gaudensio sublina.
Lideransa Komunitariu nee husu Ministeriu Saude atu rekruta mediku hodi destaka iha Postu Saude sira neebe sei presiza nunee bele responde ba nesesidade moras espesifiku sira, tanba moras espesifiku sira iha nivel Postu Saude Uaigae durante nee tenke transporta ba Sentru Saude Vemasi hafoin hetan tratamentu, tanba Postu Saude Uaigae laiha pesoal mediku.
Jornalista: Tomas Reis
Editora: Carme Ximenes
