KOVALIMA, STLTIMORLESTE.com – Dezde Timor Leste hetan ukun rasik aan too ohin loron, povu iha Fohorem, Munisipiu Kovalima, kontinua hakilar ka preokupa ba mediku sira.
Kestaun nee hatoo husi Autoridade Postu Administrativu Fatumea, Cesar Madeira Amaral ba jornalista sira iha Kovalima, Kinta (27/03/2025).
Nia hatete, iha Postu Administrativu Fatumea povu kontinua hakilar ba mediku hodi halo tratamentu ba komunidade sira, tanba dezde ukun aan Postu Saude Fatumea mediku mak problema loos.
Cesar dehan, kona-ba fasilidade saude Iha Fohorem agora daudaun sufisiente, tanba iha neeba sentru saude ida, postu saude rua, maibe mediku mak la sufisiente.
“Daudaun nee mediku iha Postu Saude Fatumea destaka deit mediku ida. Ami iha problema ba iha rekursu, tanba dezde ita ukun aan nee, iha Postu Saude nee mediku mak problema loos,” dehan Cesar.
Daudaun nee mediku iha Postu Administrativu Fatumea destaka deit mediku ida iha postu saude no postu saude rua laiha mediku, no rekursu seluk hanesan parteira nee mos menus hela, tanba iha neeba populasaun nee kuaze besik ona ba rihun lima.
Nia dehan, agora daudaun populasaun iha 4.415 maibe ho deit parteira tolu nee mos la sufisiente, tanba nee hanesan autoridade nafatin sujere ba ministeriu relevante atu halo rekrutamentu karik haree mos ba rekursu neebe destaku iha postu administrativu ba too iha suku.
Nia dehan, Autoridade Postu Administrativu nafatin servisu hamutuk ho servisu saude Munisípiu Kovalima, sentru saude Fatumea rekomenda nafatin, fo hanoin ba sira atu halo balansu, karik iha rekrutamentu tenke iha balansu, nunee mos funsionariu sira nee ba servisu karik labele postu balu iha hela rekursu neebe natoon, postu balu rekursu la too.
Iha fatin hanesan, Autoridade Postu Administrativu Fohorem, Delfin Amaral Ferreira hatutan, kona-ba saude iha Postu Administrativu Fohorem, postu saude haat, mas aldeia balu seidauk hetan postu saude, tanba haree husi komunidade no Komunidade sira husi Postu Administrativu Fatumea-Fohorem preokupa infraestrutura bazika.
(eme)
