DILI, STLTIMORLESTE.com – Povu iha Postu Administrativu Nitibe Rejiaun Administrativa Espesial Oekusi-Ambeno (RAEOA), sente kontente ho Konselhu Administrasaun Fundu Infraestrutura (KAFI) Nasional ba projetu alargamentu estrada nasional parte tasi ibun husi Suku Oenunu ba Usitaku too Suku Beneufe, hodi fasilita movimentu transportasaun povu lori sira nia produtu ba merkadu ho diak.
Informasaun nee hatoo husi Jestor Postu Administrativu Nitibe, Agustinho Afulit ba STL via Telefone, Kinta (03/07/2025) katak, iha loron Kuarta (02/07/2025), Prezidente Autoridade RAEOA, Rogerio Tiago de Fatima Lobato hanesan Presidente KAFI Regional Oecusse ho Sekretariu Rejional sira, Diretor Rejional Infraestrutura, Remigio Nuno Sila, Ajensia Dezenvolvimentu Nasional (AND) ho Komunidade Suku Suniufe, Usitaku no Beneufe, realiza serimonia hatuur fatuk dahuluk projetu emerjensia alargamentu estrada husi Suku Suni Ufe ba too Bairru Bitila Unidade Patrolhamentu Fronteira (UPF) Suku Beneufe.
Nia dehan KAFI aprova empreza tolu mak hanesan, kompanhia Lifau Indah Unipesoal Lda, kompanhia Raynaldos Unipesoal Lda no Kompanhia Colneno Unipesoal Lda, hodi reabilita estrada nasional no internasional kilometru 23,5 nuudar projetu emerjensia, hahu husi Oenunu suku Suni-Ufe ba too Citrana suku Bene-Ufe Postu Administrativu Nitibe.
“Ita nia projetu nee emerjensia, tanba estrada iha tasi ibun, kondisaun ladiak, presiza hadia hanesan estrada sira Nitibe foho ho intensaun atu hasai povu husi izolamentu, tanba ita haree rasik, iha tasi ibun, estrada ladiak difikulta movimentu komunidade sira atu asesu ba merkadu,” hateten Jestor Postu Administrativu Nitibe.
Afulit dehan, iha serimonia tau fatuk dahuluk ba Reabilitasaun estrada nee iha Suku Beneufe, Prezidente Autoridade RAEOA, Rogerio Tiago Lobato hateten, Autoridade RAEOA tau konfiansa ba empreza tolu nee, tanba iha ona esperiensia profisionalismu, atu ezekuta projetu alargamentu nee, garante nia kualidade no kumpri durasaun tempu serbisu.
“Ita nia PA-RAEOA dehan, Empreza tolu neebe sai konstrutora, antes nee hatudu ona rezultadu serbisu neebe mak KAFI rejional deside, aprova sira nia proposta, maibe Autoridade nia ejizensia mak nee, tenki garante kualidade, tanba estrada nee halo ba ema hotu, liu-liu inan aman sira iha Nitibe no estrada nee sei estrada nasional no internasional liga Oekusi ho Kupang-Indonezia liu husi Fronteira Naktuka,” dehan Agustinho Afulit.
Iha biban nee nia reprezenta komunidade Nitibe, hatoo agradese ba Autoridade RAEOA, liu-liu ekipa KAFI rejional, tanba tau konsiderasaun ba problema estrada iha parte tasi ibun nian.
“Hau lori komunidade sira, hatoo agradese ba Governu, tanba tinan kotuk reabilita ona ami nia estrada sira iha Nitibe foho hanesan Usitako Lelaufe too Lamasin, maibe tinan nee kontinua reabilita tan estrada iha parte tasi ibun, nee ami senti kontenti, tanba Nitibe maioria aldeia 17 seidauk nahee asfaltika, maibe fasilita ho ateru, neebe ami nia esperansa ba futuru bele kontinua ona estrada husi Oenunu mai too Citrana,” afirma nia
Kompanhia tolu neebe ezekuta projetu emerjensia alargamentu estrada nee mak kompanhia Lifau Indah Unipesoal, Lda sei ezekuta reabilitasaun estrada 8 KM, hahu husi Oenunu suku Suniufe too aldeia Bona suku Usitaku, Komopanhia Raynaldos Unipesoal, Lda, sei reabilita Estrada 8 KM, husi aldeia Bona Suku Usi Taku ba too Fatutoo suku Beneufe no Kompanhia Colneno Unipesoal, Lda, sei reabilita estrada ho 7,5 KM husi Fatutoo ba too Bitila Citrana Suku Beneufe.
(jos)
