DILI, STLTIMORLESTE.com – Povu no sarani Timor Leste sente triste no nakukun neebe hafalun sira, tanba sira sente lakon tebes aman diak ida Sua Santidade Papa Francisco, neebe fila ona iha Nai nia kadunan santu rohan laek iha loron Segunda (21/04/2025).
Lia triste nee hatoo husi Joana Miranda, hanesan mos Voluntariu Katolika Timor Leste ba jornalista STL iha nia knaar fatin Timor Plaza, Tersa nee (22/04/2025).
Ho matawen nia hatete, sente triste tebes tanba lakon aman no Lider Katolika Sua Santidade Papa Francisco.
“Hau sente triste tebes no sente lakon bibi atan diak, tan nee ho matawen hau diretamente ba iha oratoriu oin hodi hahu hasae orasaun ba Santu Papa, atu deskansa ho pas iha reinu lalehan,” dehan Joana.
Nia hatete, ho grasa neebe Nai Maromak hakarak ba nia ho vizita Sua Santidade Papa Francisco iha Timor Leste nia mos hetan bensaun direita husi Sua Santidade.
“Hau sente onradu tebes involve aan iha Voluntariu Katolika Timor Leste, tanba ho vizita Santu Papa mai Timor Leste mak VCTL eziste hodi kolabora ho entidades hotu servi kreda hodi fo garantia mos ba estabilidade no asegura vizitasaun lao diak nee konta mos ho ami voluntariu,” katak nia.
Nuudar sarani neebe hetan bensaun direita husi Papa oinsa ita niaa sentimentu bainhira lakon sua Santidade Papa Francisco, hatan ba kestaun nee Joana hatete, nuudar ema sarani sente lakon boot.
“Hau sente lakon boot tanba Santu Papa Francisco simbolu dame ba mundu, sente triste tebes maibe ida nee Maromak hadomi liu Santu Papa, tanba nee ita so halo deit orasaun atu nia klamar ba reinu lalehan hodi reza ba Timor Leste. Aleinde hau nee hetan bensaun, hau nia estatua Nossa Senhora de Fatima mos hetan bensaun husi Santu Papa inklui sarani sira seluk ninia estatua, tersu no ai-haan sira neebe lori ba iha Alma iha dia 10 Setembru 2024,” katak nia.
Ho Sua Santidade Papa Francisco nia mate, nuudar sarani saida mak presiza halo iha tempu ida nee? Ho matawen nia resposta katak, buat neebe nia tatoli ba Sua Santidade mak ho orasaun nunee Sua Santidade Papa nia klamar bele hakmatek iha lalehan.
“Reza nafatin halo orasaun tanba Santu Papa mate iha Dominggu Divina Mizerikordia, nee diak tebes nuudar sarani, kontinua reza ba Santu Papa, mai ita idak-idak reza ba Santu Papa no kontinua reza iha fatin neebe deit mak ita iha ba,” katak nia.
Nunee mos Sarani Rofina Soarea nuudar mos joven ba kristu ho matawen hatete, nuudar sarani sente triste no sente lakon tebes tanba lakon aman diak Sua Santidade Papa Francisco.
“Nuudar ema sarani katolika ami sente triste tebes tanba lakon ami nia aman Sua Santidade Papa Francisco, neebe Nai bolu hikas ona iha Nai nia kadunan Santu, ami sarani Timor Leste hadomi maibe Maromak hadomi liu, ami labele halo buat ida, buat neebe ami tatoli mak so ho orasaun deit, nunee Nai bele haraik fatin hakmatek rohan laek nia,” dehan nia.
Nia hatete, mate isin dook maibe orasaun ba Papa nunka falta, so orasaun mak bele tatoli ba Papa nia klamar.
“Hau sente triste tebes bainhira hanoin hetan Sua Santidade vizita mai ita nia rai doben Timor Leste, maske ho idade neebe avansadu maibe nia hadomi povu no sarani rai ida nee hodi hakat mai iha ita leet, ami husu Sua Santidade Papa atu sai nafatin reza nain mai ami nia rai atu bele kontinua hakmatek no hametin nafatin ami nia fiar iha Kristu no fiar nafatin ba ami nia relijiaun,” katak nia.
Nia mos husu sarani hotu nafatin reza ba Sua Santidade Papa nia klamar nunee bele deskansa ho hakmatek iha Nai nia kadunan santu.
(eme)
