DILI, STLTIMORLESTE.com – Relasiona ho kazu ezonerasaun ba iha eis Prezidente Konselhu Administrasaun Radio Televizaun Timor Leste (RTTL), neebe hatoo keixa ba iha Tribunal Rekursu (TR), ikus mai TR deside estadu tenke selu kompensasaun ba iha eis Prezidente Konselhu Administrasaun RTTL, tanba nee husi parte Governu nian hatoo sira nia pozisaun.
Tuir Sekretariu Estadu Komunikasaun Sosial (SEKOMS) Expedito Dias Ximenes katak, IX Governu konstitusional laiha relasaun ba kazu referida hodi selu rekompensasaun ba Gil da Costa ho valor osan US$ 68.094.00.
“Nee laiha relasaun Governu ida nee ida, nee relasaun ho VIII Governu,” dehan Expedito ba jornalista sira iha Palasiu Governu, Kuarta, (04/02/2026).
Nia hatutan, IX Governu Konstitusional sei la halo pagamentu, tanba kazu nee mosu iha tempu VIII Governu nia, liu-liu membru Governu neebe kaer ukun. Tanba nee ba iha VIII Governu depois ba ema sira neebe dirije Governu tantu laiha relasaun ho Governu ida nee.
Nia dehan, iha desizaun Tribunal ba kazu ida nee Tribunal Rekursu nia desizaun sita deit Estadu tenke selu, maibe la sita Estadu ida neebe ka Governu ida neebe.
Tanba Tribunal hateten katak Estadu, Estadu nee signifika VIII Governu nee, laos agora, tanba senhor Gil nee iha VIII Governu.
Nia akresenta, agora daudaun hanesan SEKOMS iha IX Governu Konstitusional seidauk simu notifikasauun, liu-liu ba dezaun Tribunal Rekursu relasiona kazu antigu Prezidente RTTL, Gil da Costa nian.
“Lae, hau la simu notifikasauun, ami seidauk hatene tan, ami rona deit mos iha notisia,” dehan nia.
Antes nee Eis Prezidente Konselhu Administrasaun RTTL, Naldo Rei dehan, iha loron 9 fulan Outubru 2025, Tribunal Rekursu hakotu prosesu nee ho akordaun ida hasoru desizaun sala Governu nian.
Liu husi akordaun nee, Tribunal Rekursu deside kondena Estadu Timor Leste no ezije selu kompensasaun ba nia ho pagamentu tipu rua.
“Ida selu hau nia salariu korespondente ba periodu entre 16 Janeiru 2019 no 01 Fevereiru 2022, katak tinan tolu no fulan ida ho montante total US$ 68.094.00 no mos jurus sira ho taxa legal 6%, hahu sura husi data sitasaun to loron pagamentu. Segundu selu mos ba hau montante US$ 2.000.00 ba prejuizu naun patrimonial ho mos taxa legal jurus 6%, hahu sura husi data sitasaun to loron pagamentu,” dehan Eis Prezidente Konselhu Administrasaun RTTL, Naldo Rei.
(ter)
