DILI, STLTIMORLESTE.com – Prezidente Parlamentu Nasional (PPN), Maria Fernanda Lay hateten, Parlamentu Nasional prepara ona draf alterasaun lei pensaun vitalisia, maibe duvida ho pozisaun lider bankada sira hakarak diskuti lei nee ga lae.
Prezidente Parlamentu Nasional hatete, iha reuniaun lider bankada sira aseita ona diskuti iha terseira sesaun lejislativa tanba draf iha ona.
Maibe Prezidente Parlamentu Nasional dehan, atu halo alterasaun lei pensaun vitalisia nee tenki konsulta lai, tanba kuatru pilar estadu nee hotu-hotu iha pensaun, tanba nee atu altera lae nee agora depende ba maioria.
“Entaun ida nee seidauk to iha neeba, tanba proponente mak bele determina sira aseita ga lae, hau labele tur-tur Prezidente Parlamentu Nasional mak ba asina proposta,” hatete Prezidente Parlamentu Nasional (PPN), Maria Fernanda Lay ba jornalista sira iha resintu PN, Kinta (12/22/2024)
Prezidente Parlamentu Nasional hatutan, lei la fo dalan atu hamoos hotu tanba se hamoos lei pensaun vitalisia mak veteranus sira mos sei hamoos hotu.
“La hatene tanba nasaun seluk nee depois tinan barak foin bele tranzita, tanba ita hatene katak ita nian seguransa sosial rasik foin hahu implementa iha tinan 2017, klaru katak ita labele iha espetativa hanesan eis titulares ida bele hetan kedas pensaun neebe mak boot,” informa PPN.
(alb)
