DILI, STLTIMORLESTE.com – Prezidente Parlamentu Nasional (PPN), Maria Fernanda Lay relata progresu servisu Parlamentu Nasional (PN) nomos prosesu rekrutamentu Juiz Supremu Tribunal Rekursu (STR) ba Prezidente Republika Jose Ramos Horta.
Bainhira remata hasoru malu, Prezidente Parlamentu Nasional Maria Fernanda Lay ba jornalista sira iha Palasiu Prezidensial Nicolau Lobato, Bairo Pite, Kuarta lokraik (07/01/2026) hatete, mai hasoru Prezidente hodi relata atividade neebe PN halo no progresu rekrutamentu Juiz ba Prezidente Republika Jose Ramos Horta.
“Primeiru hau laiha oportunidade atu hetan sua exelensia Prezidente Republika para hatoo hau nia boas festa santo natal ho ano novu, neebe hau mai aprezenta nomos servisu saida deit mak planu ba 2026, tanba iha asuntu balun ke transversal entre Governu ho Prezidensia Republika inklui propriu parlamentu komisaun ida kona-ba rekrutamentu ba Juiz Supremu Tribunal Rekursu no prosesu hela nee mak hau mai hatoo nia progresu ho dezafiu balun neebe ita enfrenta ligadu ho asuntu nee,” dehan PPN.
PPN dehan, tinan 2026 Prezidente Republika dezeju tenke estabelese mos Supremu Tribunal Justisa, nunee bele iha justisa ba ema sira neebe halo rekursu.
“Ho Governu ligadu mos ho reforma justisa neebe prosesu nee lao hela, ita espera katak tinan ida nee tuir dezeju Prezidente Republika katak ita tenke estabelese Supremu Tribunal Justisa para iha justisa ba sira neebe halo rekursu para labele iha Juiz atu julga nee ida deit hanesan iha momentu agora, nomos prosesu seluk neebe povu kiik sira mos hein hela para hetan justisa iha situasaun ida nee,” dehan nia.
PPN dehan, ho asuntu sira nee mak hasoru Prezidente Republika, no PPN sente asuntu sira nee urjente tanba tenke prosesa lalais para antes do fin ano 2026 Timor Leste bele iha ona Supremu Tribunal Justisa.
Kona-ba dezafiu no progresu estabelesimentu Tribunal Supremu Tribunal Justisa nia progresu too ona iha neebe? Hatan ba kestaun nee Prezidente Parlamentu Nasional dehan, ida nee foin hahu.
Aleinde nee, Prezidente Republika Jose Ramos Horta reafirma ona Estadu nia kompromisu metin atu instala tomak Tribunal Supremu Justisa iha loron 18 Maiu tinan 2026.
Jornalista: Emerenciana Pinto
