DILI, STLTIMORLESTE.com – Prezidente Republika (PR), José Ramos Horta halo abertura edisaun daruak Espozisaun Teknolojia SCI TECH Expo 2024 iha Palasiu Prezidensial.
Liu husi diskursu Prezidente Republika, Jose Ramos Horta iha Palasiu Prezidensial Bairo Pite, Sesta (15/11/2024) hatete, agradese tanba ohin bele halo lansamentu espozisaun teknolojia SCI TECH Expo 2024 daruak iha Palasiu Prezidensial.
Ramos Horta ofisialmente halao abertura ba edisaun daruak Sci-Tech EXPO 2024 iha Palasiu Prezidensial Nicolau Lobato. Eventu loron rua nee halo husi loron 15 too 16 Novembru, marka pasu signifikativu iha viajen Timor Leste nian ba avansu teknolójiku no inovasaun.
Sci-Tech EXPO 2024 nuudar parte ida iha programa promosaun turizmu TL nian iha 2024 ho tema siénsia, teknolojia no inovasaun dalan ba transformasaun no dezenvolvimentu sustentável iha TL.
PR Horta hatete, eventu nee halibur hamutuk partisipante nain 36, inklui instituisaun ensinu superior, ajensia internasional, kompanhia telekomunikasaun no empreza teknolojia prinsipal sira. Espozisaun loron rua nee hatudu programa ida neebe komprensivu inklui espozisaun siensia no teknolojia, feira ensinu superior, kompetisaun estudante no atividade kultural sira.
Horta afirma, liu husi investe iha edukasaun siensia no teknolojia.
“Ita laos deit harii infraestrutura investe iha mehi no kapasidade ita nia joven sira nian neebe sei lori Timor Leste ba futuru,” katak Horta.
Eventu nee ho objetivu atu estimula interese iha siensia no teknolojia enkuantu promove solusaun teknolojia pratika sira neebe adapta ba kontestu uniku TL nian. Ida nee serve hanesan plataforma ida atu hatudu projetu peskiza, haburas parseria edukasional sira, no dezenvolve abilidade krítiku ba estudante sira.
PR hatete, Sci-Tech EXPO 2024 nakloke ba publiku no iha atividade lubuk ida neebe hatudu nasaun nia kompromisu ba progresu iha setor oin-oin.
(eme)
