BAUKAU, STLTIMORLESTE.com – Prezidente Republika (PR), Jose Ramos Horta apoiu ekipamentu desportu ba estudante Orfanatu Santa Terezinha, iha Postu Administrativu Kelekai, Munisipiu Baukau, hodi fasilita estudante sira nia atividade estra kurikular.
Prezidensia Republika liu husi Unidade Sosiedade Sivil no Apoiu Sosial Palasiu Prezidensial, lidera husi Koordenadora Jeral Tereza dos Santos Ximenes, entrega ekipamentu desportivu ba Estudante Orfanatu Santa Terezinha de Menino Jesus (Dom Bosco), Kelikai, Munisípiu Baukau.
Apoiu nee inklui 50 farda football, 50 farda voleibol, 60 sapatu no 60 roupa balun mai husi Prezidente nia Doador sira husi Honkong-Xina, ho objetivu atu fasilita estudante sira nia atividade ekstra-kurikular.
Iha biban nee Koordenadora Jeral ,Tereza dos Santos Ximenes liu husi nia aprezentasaun iha Baubau, Kuarta (03/09/2025) dehan, apoiu ida nee mak inisiativa direta husi Prezidente Republika, Jose Ramos Horta, neebe atu hatudu nia solidariedade ba estudante sira, liu-liu iha orfanatu.”
Nia hateten, parte husi ekipamentu mak hetan donasaun husi belun Prezidente Ramos-Horta nia belun diak iha Honkong-Xina, neebe distribui liu husi Palasiu Prezidensial.
Nunee mos Padre Albino Fernandes, enkaregadu Lar Santa Terezinha, hatoo nia agradesimentu ba Prezidente Ramos Horta.
“Apoiu desportivu ida nee signifikadu tebes. Nee hatudu tebes Prezidente nia fuan nafatin iha estudante orfanatu sira, neebe mak sai futuru Timor-Leste.” dehan Padre Albino.
Total estudante husi orfanatu nee hamutuk 51, mai husi Munisipiu oioin, neebe estuda hamutuk iha Lar Don Bosco Kelikai.
Estudante Angelino Rui Gomes mos hatoo nia gratidaun ho kontente. Tanba sir abele hetan ona apoiu husi Prezidensia Republika.
“Ami sei bele iha farda no bola atu treina. Prezidente hatudu nia fuan boot, hanoin ami iha orfanatu,” dehan nia.
Jornalista: Emerenciana Pinto
Editora:Carme Ximenes
