DILI, STLTIMORLESTE.com – Prezidente Republika (PR), Jose Ramos Horta apoiu ideia husi familia matebian Zizelma, no konsidera desizaun Tribunal laloos.
Prezidente Republika, Jose Ramos Horta hatoo kestaun nee ba jornalista sira, bainhira remata partisipa asina memorandu entre Instituto Camões nomos Ministeriu Edukasaun iha EBF Farol, Dili, Kinta (03/04/2025).
“Hau konkorda ho familia nia sentimentu, publiku nia sentimentu, juis neebe halo desizaun ida nee halo sala boot, devia iha prosesu disiplinar kontra juis nee, nee la signifika interferensia iha, problema mak ita nia Konselhu Superior Majislatura neebe atu halo monitoramentu supervizaun ba servisu setor justisa sei la halo,” dehan PR, Horta.
Tanba Konselhu Superior Majislatura mos partidarizasaun fali sistema la permite ida nee, eleitu husi Parlamentu partidu ida ho nia ema.
“Iha rai seluk hau akompanha mezmu Amerika demokrasia makaas, juis uluk iha neeba hetan punisaun uluk hau konselhu iha neeba hau haree juis hetan punisaun juis ba kadeia, tanba sistema la halimar o juis laos o asin da lei, entaun halo kazu ida nee halo sala boot, hau espera juis senior sira iha tribunal rekursu haree buat sira nee, Prokurador Jeral Republika haree buat sira nee tanba se lae ita nia justisa kada vez kredibilidade menus liu,” katak PR, Horta.
Iha loron Kuarta familia matebian hamutuk ho Komite 12 Novembru no Grupu Amizade Rezistensia realiza konferensia imprensa hodi kontra desizaun Tribunal Judisial Primeira Instansia Dili, tanba konsidera desizaun la justu.
(eme)
