DILI, STLTIMORLESTE.com – Prezidente Republika (PR), Jose Ramos Horta apoiu atu halao revizaun ba lei pensaun vitalisia, tanba deputadu balu tur iha Parlamentu Nasional tinan 5 deit mos hetan ona pensaun.
Asuntu halao revizaun ba pensaun vitalisia nee kleur ona Prezidente Republika koalia, Governu, partidu hotu-hotu konkorda atu halo revizaun ba lei pensaun vitalisia nee, tanba deputadu balu tinan hira ona iha Parlamentu dezde 2001, iha Konselhu Nasional UNTAET nia tempu depois mai iha Asembleia Konstituante asumi tinan 20 pelumenus, maibe deputadu balu foin tama tinan 4 ka 5 mos hetan pensaun vitalisia ida nee mak injustu loos.
“Hau hatete dala hira ona, tinan hira nee nia laran kuitadu mestri oan ida be hanorin ita nia oan sira tinan 70 ona hau fo kondekorasaun ba sira iha palasiu laran sira laiha pensaun vitalisia, maibe deputadu ida tinan 4 ka 5 iha ona pensaun vitalisia, ida nee mak labele nee tenke haree, maibe tenke haree mos direitu arkeridu lei hatete direitu arkeridu, hotu-hotu konkorda atu haree fila fali no lalais labele dehan haree, maibe la haree tenke iha prazu para haree para halo buat neebe ita haree justu,” dehan Prezidente Republika, Horta.
Tanba tuir Xefe Estadu estudante no sosiedade sivil neebe ezije tur ho Bankada sira koalia no Bankada sira tenke rona estudante sira fo idea esplika nee mak tenke halo. “Hau konkorda laiha partidu ruma hatete lae tenke mantein,” katak Horta.
Aleinde nee hanesan Prezidente Republika, Horta apoiu tomak atu halo revizaun ba pensaun vitalisia, tanba partidu Politiku nomos membru Governu mos aseita halao revizaun ba lei nee.
Entretantu hatan kona-ba karik halakon pensaun vitalisia sei fo implikasaun ba orgaun seluk kalae, hatan ba kestaun nee Prezidente Republika hatete tenke halakon duni, hotu-hotu konkorda atu halakon mak haree fali buat seluk oportunidade diak ba IX Governu liu-liu Primeiru Ministru, Xanana Gusmão, tanba nia mak lider nasional ema ho matenek ho fuan halo desizaun neebe diak nunee ekilivre tiha buat balu neebe lalos.
Jornalista: Emerenciana Pinto
Editora: Carme Ximenes
