DILI, STLTIMORLESTE.com – Prezidensia Republika (PR) fo apoiu kulsaun no sumasu ba Dormitoriu Feminina Uma Esperansa iha Maliana.
Prezidensia Republika liu husi unidade Sosiedade Sivíl no Asuntu Sosial, entrega kulsaun, sumasu, no fronhas ba Dormitoriu Feminina Uma Esperansa iha Aldeia Oplegul, Suku Holsa, Postu Administrativu Maliana.
Apoiu nee mai husi orientasaun direta Prezidente Republika (PR) Jose Ramos Horta, hafoin vizita ba orfanatu nee iha semana anterior, wainhira Madre SSpS sira hatoo situasaun labarik sira neebe toba seidauk ho kulsaun no sumasu neebe adekuadu.
Iha biban nee Asesor Prezidensia Republika, Quintiliano Moniz ba jornalista iha Maliana Kuarta Kalan (04/02/2026) hateten, apoiu nee laos primeira vez, tanba antes nee Prezidensia Republika mos halo ona konstrusaun uma ho sala han fatin no entrega makina postura (Suku-Hena) ba Orfanatu refere.
“Apoiu nee mai husi Prezidente Ramos-Horta nia konsiensia rasik, laos deit apoia ba uma mahon Esperansa nee, maibe ba mos orfanatu sira iha munispiu seluk, Prezidente tau prioridade liu ba labarik sira ka familia neebe kbiit natoon (Vulneravel). Ba tinan ida nee Prezidente tau prioridade ida mos ba Uma Esperansa ida iha Munisipiu Baukau tanba labarik lubuk ida mak toba deit iha rai. Nee atu kompleta deit servisu sosial Governu nian,” hateten Quintiliano.
Responsavel Orfanatu Uma Esperansa husi madre relijioza Kongregasaun “Servas do Espírito Santo” (SSPS), Me. Aurelia Rosa da Costa hatoo agradesimentu ba Prezidensia Republika ba apoiu nee.
“Hodi labarik sira nia naran ami hatoo profundu agradesimentu ba Prezidente Ramos-Horta neebe ho laran luak, fo ona resposta ba ami nia pedidu neebe ami hatama iha semana anterior no ohin ekipa bele tuun direta hodi lori material no ekipamentu neebe ami husu,” dehan Madre.
Iha serimonia simbolika entrega sasan, Sekretariu Autoridade Munisípiu Bobonaro ba Asuntu Administrasaun no Finansas, Domingos da Costa, partisipa no hatoo mos agradesimentu ba Prezidensia Republika. Nia husu atu apoiu hanesan nee laos deit ba Orfanatu Uma Esperansa, maibe mos ba orfanatu sira seluk iha postu administrativu sira iha Bobonaro.
Sasan neebe madre sira simu mak kulsaun no sumasu hamutuk 40, aumenta tan kolsa kama nian. Madre sira mos hatoo pedidu ba apoiu tan hanesan komputador no sasan mobiliariu hanesan meza no kadeira, atu bele loke kursu edukativu kona-ba informatika ou komputador, no tuir planu 2026 sei loke tan kursu lian Portugues no Ingles ba labarik sira.
Agora dadaun Orfanatu Uma Esperansa simu labarik nain 20, maioria mai husi família kbiit natoon no enfrenta problema sosial hanesan inan-aman divorsiu, trauma no inan-aman destinu.
(eme)
