DILI, STLTIMORLESTE.com – Prezidensia Republika (PR) kada loron kontinua buka apoiu nesesidade baziku esensial no material desportu ba povu neebe mak hela iha area remotas.
Prezidensia Republika liu husi sosiedade sivil Prezidensial Republika kontinua apoiu komunidade neebe moris vulneravel, iha munisipiu sira, hanesan foin lais apoiu komunidade Lourba iha Bobonaro ho nesesidade esensial.
Tuir komunikadu neebe STL asesu husi media Prezidensia Republika Segunda (20/10/2025) hatete, hodi kompleta entrega “Uma Dignu”, Prezidensia Republika habelar ninia apoiu ba komunidade jeral suku Lourba liu husi distribuisaun nesesidade bazika esensial no material desportivu.
Hodi lidera distribuisaun nee, Asesor Prezidensial Quintiliano Moniz reafirma Prezidente Ramos-Horta nia mensajen kona-ba apoiu inkluzivu.
Nia enfatiza katak, Prezidente nia preokupasaun too ba komunidade tomak, laos deit rezolve nesesidade uma nian neebe krítiku, maibe mos nesesidade bazika loron-loron nian neebe garante estabilidade no moris-diak ba rezidente hotu. Asaun ida nee hatudu Prezidente Ramos Horta nia kompromisu atu too ba komunidade sira ho asistensia pratika no direta.
Pakote ajuda nee inklui ai-haan bazika importante hanesan foos, mina-tein, no manu-tolun atu haforsa seguransa ai-haan, hamutuk ho manta atu fo konfortu. Iha tempu hanesan, material desportivu mos distribui ba juventude no estudante lokal sira, ho objetivu atu promove saude fízika, serbisu-ekipa, no atividade rekreiativa pozitivu iha komunidade laran.
Distribuisaun nee hetan apresiasaun boot husi autoridade lokal sira, hahu husi Prezidente Autoridade Munisípiu Bobonaro, Paulo Moniz Maia, too xefe suku, neebe simu ho diak apoiu direta no pratiku nee.
Asaun apoiu diretu ba komunidade nee ezemplifika Prezidente Ramos-Horta nia abordajen olistiku no sentradu-ba-povu ba governasaun.
Ida nee hatudu kompromisu ida neebe haree ba sidadaun sira nia moris loron-loron, hodi haforsa Prezidensia nia dedikasaun atu harii nasaun ida neebe reziliente, iha neebe komunidade hotu sente katak ema haree, rona no apoia sira.
Jornalista: Emerenciana Pinto
Editora: Domingas Gomes
