DILI, STLTIMORLESTE.com – Prezidente Republika (PR), Jose Ramos Horta liu husi sosiedade sivil entrega prezente natal 2025 ba Uma Mahon Beato Tomasu Maria Fusco iha Baucnanan, Citrana RAEOA Oe-Cusse.
Prezidente Republika Jose Ramos Horta liu husi Unidade Servisu Apoiu Sosial, lidera husi Koordenadora Teresa Ximenes, entrega prezente natal 2025 ba Uma Mahon Beato Tomasu Maria Fusco iha Baucnanan, Citrana RAEOA Oe-Cusse. Apoiu nee inklui nesesidade bazika (roupa, fos, mina, supermie, sardina, manu-tolu, kafe, masin-midar) hamutuk ho manta no farda desportiva.
Teresa Ximenes hatete, Prezidente Jose Ramos Horta tinan-tinan kontinua halo apoiu sosial ba orfanatu, uma mahon no instituisaun sira neebe servisu tau-matan ba labarik orfanatu sira iha RAEOA no munisípiu seluk.
“Prezente simples neebe ita nia Sua Exelensia Prezidente Republika oferese ba nia komunidade liu-liu jovens foin-sae sira neebe hela iha Orfanatu no Uma Mahon nee atu bele ajuda sira iha tempu badak,” esplika Koodenadora Teresa liu husi komunikadu neebe STL asesu husi media PR, Kuarta (19/11/2025).
Nunee mos Responsavel Jeral Uma Mahon, Madre Santina de Oliveira Camões, hatoo nia agradesimentu ba Prezidente Republika no husu apoiu atu hadia kondisaun uma refere, tanba estudante sira presiza espasu diak atu aprende.
“Ami nia uma mahon nee atu ajuda estudante sira, laos ami harii hanesan kolejiu para ita nia oan sira mai hela iha nee atu selu, maibe fasilita sira atu sira bele hela iha nee mak ba eskola. Ami nia komunidade hakarak buka sentru neebe diak ba estudante sira, tanba nee hau husu ba Nai Prezidente Republika atu hari uma diak ida mai ami, atu nunee ita nia estudante sira bele uza hodi halao sira nia prosesu aprendizajen,” hateten Madre Santina, iha Uma Mahon Baucnanan, Citrana.
Uma Mahon nee simu estudante hamutuk 41, total feto 28 no mane hamutuk 13, maibe sira hela haketak malu. Sira hotu kuaze mai husi Oe-Cusse oan no sira mai hela iha uma mahon nee, laos hanesan kolejiu maibe sira mai hela iha Uma Mahon nee tanba distansia ba eskola dook.
Uma Mahon nee madre sira nian ho inisiativa rasik mak sira harii. Madre sira oferese mos kursu alfaiate hanorin suku hena, guitarra, bidu, dansa tradisional no dezeñu ba estudante sira iha nee, maske sira infrenta dadaun dezafiu husi kondisaun real nee no sira espera bele tulun ruma husi nasional liu-liu husi Prezidensia Republika. Ekipa Prezidensia kontinua halo distribuisaun prezente natal ajuda ba orfanatu sira iha Carmelita no Topo Honis iha Oe-Cusse.
Jornalista: Emerenciana Pinto
Editora: Domingas Gomes
