DILI, STLTIMORLESTE.com – Prezidente Republika (PR), José Ramos Horta destaka valor amizade no profisionalizmu iha eventu desportivu Revolta Combat 2025.
Prezidente Republika, Jose Ramos Horta marka prezensa iha jantar neebe halao hafoin eventu desportivu Revolta Combat 2025, iha neebe Prezidente hatoo ninia rekonhesimentu ba inisiativa husi Diretor Ezekutivu Xander Serrano no boxista sira hotu neebe partisipa husi Timor Leste no Indonezia.
Tuir Komunikadu neebe STL asesu husi media Prezidensia Republika, Segunda nee (04/08/2025) haktuir iha eventu nee Xefe Estadu sublina katak, importante liu laos deit atu manan, maibe valor desportu loloos iha promosaun ba amizade no hatudu profisionalizmu entre atleta sira.
Iha sentidu ida nee, Prezidente husu atu hametin nafatin relasaun amizade ho Indonezia, liu-liu ho provinsia vizinhu Nusa Tenggara Timur (NTT), liu husi eventu desportivu sira neebe promove interkambiu no kooperasaun.
Eventu Revolta Combat 2025 halao ona iha loron 1 fulan Agostu no partisipa husi boxista IndoneI hasoru boxista husi klube Boxe Timoroan nian.
Iha rezultadu final Boxista Timoroan Daniel de Assis Belo husi klubu El-Matador, neebe sai vensedor ba Revolta Profisional Champion Belt 2025 hasoru Krispinus Holo husi Indonezia (NTT), iha kompetisaun neebe makaas.
(eme)
