DILI, STLTIMORLESTE.com – Prezidente Republika (PR), Jose Ramos Horta diskute ho Konsorsiu Omaní atu haree investimentu iha dezenvolvimentu Timor Leste (TL).
Iha loron Segunda (21/07/2025) Prezidente Republika, Jose Ramos Horta hasoru malu ho reprezentante sira husi empreza Al-Thana Internasional Trad. & Co. L.L.C, iha Palasiu Prezidensial segunda-feira nee. Konsorsiu ida husi Sultanadu Oman, hodi koalia kona-ba investimentu potensial ho eskala boot iha Timor-Leste.
Delegasaun nia vizita fo sinal klaru ba konfiansa husi investidor internasional sira neebe aumenta iha trajetoria ekonomika nasaun nian no lideransa neebe estavel.
Konsorsiu espresa interese makaas iha setor xave rua dezenvolvimentu munisípiu komprensivu no estabelesimentu kadeia farmasia nasional ida, ho prezensa iha kapital munisípiu idak-idak. Reprezentante sira nota katak sira sente impresionadu ho kreximentu lalais Timor Leste nian no oportunidade sira atu halo parseria iha ninia dezenvolvimentu, hodi hateten katak sira hakarak “buras hamutuk ho nasaun”.
Prezidente Republika Jose Ramos Horta fo benvindu ba investimentu sira neebe propoin hodi destaka sira nia potensial atu hasae makaas infraestrutura nasional no hadia asesu populasaun ba servisu saude publika.
Xefe Estadu sublina mos katak, inisiativa sira nee alina ho vizaun nasaun nian atu haburas kreximentu ekonomiku neebe sustentavel no hasae kualidade moris ba sidadaun Timoroan hotu-hotu.
(eme)
