DILI, STLTIMORLESTE.com – Prezidente Republika (PR) Jose Ramos Horta halao enkontru ho Embaixadora Portugal iha Timor Leste, hodi diskuti eventu boot neebe sei envolve CPLP nomos vizita Primeiru Ministru Portugal neebe sei mai Timor Leste.
Bainhira remata hasoru malu, Embaixadora Portugal mai Timor Leste, Manuela Bairros ba jornalista sira iha Palasiu Prezidensial Nicolau Lobato, Bairo Pite, Dili, Kuarta (20/11/2024) hatete, hasoru malu nee laos rutina, maibe enkontru ohin koalia kona-ba eventu boot neebe sei envolve CPLP nomos vizita Primeiru Ministru Portugal mai Timor Leste.
“Ohin nee hanesan sorumutu ida laos rutinamente halo ida nee, maibe enkontru ohin nee atu koalia ba saida mak sei hasoru iha tinan foun mai, no hanesan imi hotu hatene katak iha tinan oin sei iha eventu boot ida neebe sei envolve CPLP, no sei iha mos vizita husi Primeiru Ministru Portugal nian mai Timor Leste, no sura husi nee ba oin iha deit tempu efetivu fulan 6 ba eventu sira nee,” dehan Embaixadora Portugal nee.
Nia dehan, Primeiru Ministru Portugal mos hetan konvite husi Primeiru Ministru, Kay Rala Xanana Gusmão atu partisipa iha konferensia unidade Lusa no Aziátiku neebe sei halao iha fulan Junhu 2025.
Iha vizita Primeiru Ministru Portugal nian nee konserteza sei koalia liu kona-ba edukasaun, influensia lian portugues no sira nee hotu mak sei sai hanesan reflesaun ba iha projetu kooperasaun sira entre país rua.
Entretantu Prezidente Republika, Jose Ramos Horta mos haksolok hodi halo enkontru ho Embaixadora Portugal mai Timor Leste, Manuela Bairros, hodi koalia kona-ba asuntu importante sira liga ho asuntu vizita Primeiru Ministru Portugal no seluk tan.
(eme)
