DILI, STLTIMORLESTE.com – Prezidente Republika (PR), Jose Ramos Horta halao enkontru ho Reitor Universidade Atma Jakarta ho Embaixador Indonezia iha Timor Leste, hodi diskuti konaba asuntu edukasaun no seluk tan.
Bainhira remata hasoru malu, Embaixador Republika Indonezia ba Timor Leste, Okto Dorinus Manik ba jornalista sira iha Palasiu Prezidensial Nicolau Lobato, Bairo Pite, Dili, Segunda (18/11/2024) hatoo agradese ba Prezidente Republika, tanba bele simu Reitor Universidade Atma Jakarta ho estudante Timoroan neebe halao estudu iha universidade refere.
“Ohin dader nee ami hatoo agradese ba Prezidente Republika Timor Leste, tanba bele simu Reitor Universidade Atma Jakarta Prof Dr Yuda Turana, Sp. S koalia asuntu lubuk ida ho PR Horta,” katak Embaixador nee.
Nunee mos Reitor Universidade Atma Jakarta, Prof Dr Yuda Turana, Sp. S hatutan, loron ohin nia sente kontente hasoru malu ho PR Ramos Horta, tanba PR rasik iha ligasaun neebe mak diak ho Universidade Atma.
“Prezidente Republika iha ligasaun neebe mak diak tebes ho Universidade Atma Jakarta, tanba iha tinan 2020 no tinan 2022 viajen dala rua ba iha Universidade Atma Jaya,” katak nia.
Nia hatete, objetivu husi enkontru nee atu kontinua ho kooperasaun servisu neebe halao ona espesial iha area edukasaun, iha Unika Atma Jaya, ezemplu oras nee daudaun beasiswa 59 husi Timor Leste mak halao estudu iha Unika Atma Jaya, foti area manajemen, sekolozi, akuntansi no bio teknolojia.
Entretantu Prezidente Republika, Jose Ramos Horta sente kontenti hodi hasoru malu ho Reitor Universidade Atma Jakarta, Prof Dr Yuda Turana, Sp. S ho Embaixador Republika Indonezia ba Timor Leste, nomos estudante sira.
Prezidente Republika mos sente kontenti ho programa husi Universidade Atma Jaya neebe mak bele simu mos beasiswa husi Timor Leste, hodi halao estudu iha universidade refere no ba oin presiza servisu hamutuk iha area edukasaun nian.
(eme)
