AMBENO, STLTIMORLESTE.com – Prezidensia Republika (PR) liu husi Unidade Servisu Sosiedade Sivil no Assuntu Sosial, Lidera husi Asesor Prinsipal Quintiliano Moniz Carvalho, hamutuk ho Assesor Asuntu Sosial Oecusse ho Xefe Suku Bobocase, entrega ofisialmente uma ida ba inan Fauk faluk Balbina Beno liu husi serimonia inaugurasaun ho koa fita, iha Aldeia Bihala, Suku Bobokase, Postu Administrativu Pantemakasar, Rejiaun Administrativu Espesial Oecusse-Ambeno (RAEOA) iha loron Sesta (29/08/2025).
Tuir Asesor Prinsipal Presidensial Republika, Quintiliano Moniz Carvalho iha ninia deskursu katak, inisiativa ida nee realiza, depois de observasaun husi Ekipa Servisu Servisu Sosiedade Sivil no Asuntu Sosial (SSAS), Assesoria Asuntu Oecusse, Agustinho Caet ho Autoridade Lokal ba inan faluk Balbina Beno ho nia oan feto faluk mos, iha Bairru Bihala, neebe hatudu katak kondisaun moris no uma balu la garante seguru ba familia nee, liu-liu durante tempu anin boot no udan boot.
Tuir informasaun neebe relata husi inan faluk Balbina katak, nia kaben mate tiha ona iha tinan 2001. Hafoin husi moris neebe moruk nee, inan faluk ho oan kiak sira nee seidauk hetan esperansa foun ruma too agora, tanba nee autoridade lokal husi Aldeia nee ho initiative, halo Pedidu direta ba Prezidente Republika J. Ramos Horta. Tuir despaixu husi Prezidente Republika no fo orientasaun ba Assesor SSAS hodi hamutuk ho Autoridade lokal atu inisia konstrusaun.
Konstrusaun uma foun nee, ho medida 8×7 metru, halao durante fulan tolu, hahu iha loron 13 Maiu 2025 no remata iha 8 Agostu 2025. Estrutura uma nee kompostu husi kuartu rua, sala vizita, sala ba han nian, dapur no haris fatin inklui loke mos kios ida ba sira, atu sira bele sustenta sira nia ekonomia familia nian. Konstrusaun nee konstrui direta husi Ekipa Servisu Sosiedade Civil no Assuntu Sosial Prezidensia Republika nian.
Tuir Assesor Asuntu Sosial Oecusse, Agustinho Caet katak, inan faluk nee identifika, bainhira mosu desastre naturais iha Bairru Bihala, tanba nee husi parte Assesoria Asuntu Oecusse neebe tutela iha Prezidente Autoridade nia okos, buka dalan liu husi dere odamatan Prezidente da Republika Jose Ramos Horta maka apoiu fundus no konsege harii uma dignu ida ba inan faluk, Balbina Beno ho nia oan feto mos sai inan faluk tanba abandona husi ninia katuas oan.
“Hau agradese ba apoiu fundus husi Prezidente da Republika, Jose Ramos Horta liu husi Unidade Servisu Sosiedade Sivil no Assuntu Sosial, konsege konstrui uma ida ho dignu ba inan faluk Balbina Beno,” dehan nia.
Iha oportunidade hanesan, Xefe Suku Bobocase, Thomas Nesi agradese mos ba prezidente da Republika liu husi Unidade Servisu Sosiedade Sivil no Assuntu Sosial konsege harii ona uma dignu ida ninia povu neebe moris vurneravel liu iha ninia suku rasik.
Nunee mos Inan faluk, Balbina Beno, hatoo agradese wain no husu obrigado wain ba Prezidente da Republika, Jose Ramos Horta ho Unidade Servisu Sosiedade Sivil no Assuntu Sosial Presidensial da Republika nomos Assesoria Asuntu Sosial Oecusse neebe buka meus oi-oin konsege harii ona uma dignu ida ba nia hodi hela.
“Hau hatoo obrigadu wain ba Prezidente da Republika, Jose Ramos Horta ho Unidade Servisu Sosiedade Sivil no Assuntu Sosial Presidensial da Republika nomos Assesoria Asuntu Sosial Oecusse neebe buka meus oi-oin konsege harii ona uma dignu ida ba nia hodi hela atu goza hau nia moris iha loron ikus,” dehan inan Faluk Balbina Beno ho Matawen suli turu iha jornalista no povu Suku Bobocase oin.
Seremonia entrega uma foun nee neebe mak simboliza laos deit oferta habitasaun dignu, maibe mos hanesan sinal solidariedade no esperansa ba familia vulneravel sira iha TL. Hafoin entrega uma dignu ida nee, Prezidensia Republika liu husi Unidade Servisu Sosiedade Sivil no Assuntu Sosial, Lidera husi Asesor Prinsipal Quintiliano Moniz Carvalho fornese aihan hanesan Mina, Bimoli, foos, ropa, sapatu no seluk-seluk tan ba inan aman kbiit laek sira iha Suku Bobocase hamutuk benefisiarius 50 resin, nunee iha lokraik kontinua distribui mos ajudus sosial hanesan ba grupu kbiit laek sira iha Suku Taiboko no ikus oferese aihan no ropa ba labarik sira husi Orfonato Topu Honis neebe lokaliza iha Suku Kutete, bairru Mahata.
Jornalista: Joseph Koa
Editor: Joseph Koa
