DILI, STLTIMORLESTE.com – Prezidente Republika (PR), Jose Ramos Horta fahe nesesidade baziku ba komunidade uma kain 40 iha Suku Biseuk, Postu Administrivu Tilomar, Munisipiu Kovalima.
“Ohin lori deit sasan ruma ajuda umanitaria maske oituan nee ba familia uma kain 40 nee ita boot sira mak identifika hanesan nesesidade espesial, maibe sei iha nesesidade nafatin, no balu uma aat, uma la diak, hau bele haree hodi tau matan,” dehan PR, Horta.
Prezidente Republika hatete, laos apoiu nesesidade baziku ba komunidade uma kain 40 iha Suku Biseuk nee deit, maibe Prezidente Republika mos kontinua buka apoiu ba komunidade seluk neebe moris vulneravel no Prezidente Republika buka apoiu komunidade neebe uma la diak.
Durante vizita iha Munisipiu Kovalima, Xefe Estadu, Jose Ramos Horta halo asaun sosial ba komunidade kbiit natoon.
Tuir observasaun neebe mak STL hetan, nesesidade baziku neebe mak oferese husi Prezidente Republika ba komunidade iha Munisipiu Kovalima mak hanesan foos, mina, manu tolun, inklui mos ropa sapatu no sasan seluk tan.
(eme)
