DILI, STLTIMORLESTE.com – Prezidensia Republika (PR) liu husi Sekretariu Gabinete Prezidente nian, fahe sasan esensia ba prizioneiru nain 130 iha Prizaun Rejional Suai.
Delegasaun ida husi Prezidensia Republika neebe lidera husi Sekretariu Gabinete Prezidente nian, vizita estabelesimentu Prizaun Rejionsl Suai, iha ambitu husi inisiativa ida ba apoiu sosial promove husi Prezidente Republika, Jose Ramos Horta.
Iha vizita nee, delegasaun fahe ona sasan esensial ba prizioneiru nain 130, inklui ropa, manta no farda desportivu neebe simu direita husi Diretor Estabelsimentu Prisional Suai, Rui Gonçalves.
Asaun ida nee konklui inisitiva Prezidensia Republika nian atu haluan tan apoiu sira, liu-liu fo apoiu umanitariu ba prizioneiru sira iha Timor laran tomak. Sasan sira neebe fahe mai husi doasaun jenerozu ida husi Hongkong AB Charity Foundation.
Molok halo distribuisaun iha Suai, inisiativa nee iha ona benefisiadu 450 husi prizaun Becora, Dili neebe hetan asistensia, no prizioneiru 110 husi estabelesimentu Prizional Gleno, Ermera. Hamutuk prizioneriu 690 neebe hetan apoiu iha estabelesimentu prizional tolu neebe hetan ona apoiu nee.
Tuir komunikadu neebe STL asesu husi media PR, Sesta nee (20/06/2025) katak, ida nee hanesan instrusaun direta ida husi Prezidente atu fo apoiu ba maluk sidadaun sira iha fatin sira nee.
Sasan sira nee inklui ekipamentu desportivu no roupa loron-loron nian, iha hanesan parte ba atividade rekreativu no hanesan mos ba uzu loron-loron nian husi prizioneiru sira.
Aleinde nee ekipa lojístika Prezidensia Republika nian asegura koordenasaun sira ho autoridade prizional sira, atu garante katak ajuda sira distribui ho efetivu no justu.
Inisiativa ida nee hatudu solidariedade Prezidente nian ba ema hotu-hotu, inklui prizioneiru sira iha espiritu inkluzaun no dignidade ba ema hotu-hotu iha Timor Leste.
Nunee mos Prezidente Republika, José Ramos Horta hatete, kada loron ekipa Prezidensia Republika kontinua ba iha area rurais sira hodi buka apoiu povu kbiit laek sira neebe presiza tulun.
(eme)
