DILI, STLTIMORLESTE.com – Loraik sei iha reseisaun husi Aeroportu Internasional too mai Palasiu Prezidensial hodi simu Prezidente Republika (PR), Jose Ramos Horta neebe fila husi Roma, Vatikanu mai Timor Leste.
Tuir informasaun neebe mak STL hetan husi ekipa media Preziedensia Republika katak, bainhira Prezidente Republika fila husi Aeroportu sei iha sekuensia importante sira, no iha reseisaun husi Aeroportu too Palasiu Prezidensial.
“Avizu-avizu favor fahe tutan, loron 24 fulan Novembru 2025, sei iha reseisaun husi dalan Aeroportu to Aitarak-laran, iha oras 14:00 – 15:00, Ba kondutor ka motorista sira, favor buka dalan alternativa hodi minimiza engrafamentu (macet). Obrigadu barak,” dehan aizu neebe fahe husi media PR, Segunda (24/11/2025).
Ajenda neebe STL hetan Prezidente Republika, Jose Ramos Horta too hikas iha Timor-Leste hafoin vizita trabalhu ba Roma (Italia), iha Aeroportu Internasional, Dili.
Bainhira too iha Aeroportu, sei simu offisial husi ekipa Prezidensia Republika ho entidade estadu no kontinua mai Palasiu Prezidensial hodi hatoo mensajen Papa Leão XIV ba povu no sarani Timor Leste.
Sekuensia, hafoin Tun husi Aviaun sei simu VPM no kontinua ho Guarda de Honra. Remata Guarda de Honra, entrega ai-funan no Tara Tais husi VPM no Labarik sira no kontinua lao tama ba sala VIP.
Bainhira sai husi sala VIP, lia nain sira simu Prezidente Republika, Jose Ramos-Horta iha odamatan sala VIP no kontinua sae kareta Moke.
Durante viajen husi Aeroportu too PPR, iha dalan sei iha drum band no simu husi estudante no komunidade. Hanesan Saida mak halo ona bainhira S.E. PR ho S.E. PM fila husi Malazia foin lalais nee.
Too iha PPR, sei iha reseisaun husi Drum Band, Moradores, orfanatu no funsionariu PPR. Ikus liu ho Konferensia Imprensa. Iha Momentu nee sei la iha Sesaun Pergunta. Karik iha Pergunta, bele iha oportunidade iha ajenda tuir mai.
Foin lalais Prezidente Republika, Jose Ramos Horta, hahu vizita trabalhu ba Republika Italiana no vizita Estadu ida ba Santa Se, husi loron 18 too 23 fulan-novembru tinan 2025. Vizita nee sublina Timor Leste nia parseria internasional neebe metin no selebra Prezidente nia dedikasaun moris tomak ba pas no demokrasia. Programa inklui onra akademiku signifikativu sira iha Italia no kompromisu diplomatiku sira ho nivel aas iha Vatikanu.
Prezidente Republika nia vizita trabalhu ba Italia marka ho nomeasaun ho titlu profesor ativu no Doutor Honoris Causa. Aleinde nee halo enkontru mos ho sua Santidade Papa Leao iha Vatikanu.
Iha loron 19 fulan Novembru, Universidade Messina nian, hanesan instituisaun ida neebe istoriku liu iha Italia neebe estabelese iha tinan 1548, fo premiu ba Prezidente Republika, Ramos Horta ho Doutor Honoris Causa iha Siensia Polítika.
Rekonesimentu ida-nee fo onra ba Prezidente Ramos-Horta nia kontribuisaun esepsional sira ba rezolusaun konflitu, diplomasia, no harii nasaun.
Iha loron 21 fulan Novembru, Prezidente Republika, Ramos Horta sei simu titlu profesor husi Universidade Link Campus iha Roma. Ida nee rekonese Prezidente Ramos Horta nia kompromisu neebe metin ba pas, demokrasia, no direitus umanus.
Jornalista: Emerenciana Pinto
Editora: Carme Ximenes
