DILI, STLTIMORLESTE.com – Prezidente Republika (PR), José Ramos Horta liu husi nia gabinete kada loron buka apoiu povu kbiit laek, aleinde nee apoiu mos komunidade uma kain 2 neebe hetan insediu iha Maubesi.
Prezidélensia Republika halo vizita Maubisi hodi fo apoiu ba uma kain rua neebe hetan insendiu iha Maubisi.
Prezidente Republika Jose Ramos Horta no Laureadu Nobel ba Paz liu husi Unidade Servisu Soliedariedade no Apoiu Sosial, halo vizita no fo apoiu sosial ba família rua neebe nia uma hetan insendiu iha Aldeia Malaria, Suku Maulau, Postu Maubisi, Munisipiu Ainaro.
Durante vizita nee, Asesor Quintiliano Moniz ho ekipa hamutuk ho Autoridade Lokal sira entrega ajuda emerjensia hanesan foos, ropa, manu tolun, mina, sabaun, rinso, osan cash emerjensia nian no mos nesesidade bazika seluk tan, hodi responde ba situasaun difisil neebe família vítima sira enfrenta.
Uma kain rua nee susar total tan insediu mak akontese iha loron balu liu ba, tanba problema lilin neebe sira sunu iha uma laran no haluha huu-mate, enkuantu sira seluk ba hotu toos laran hodi kuu kafe, hela mak avô feto ho nia beioan kiik iha uma.
Tuir Komunikadu neebe STL asesu Sesta nee (18/07/2025) hatete, liu deit loron balun Prezidente Ramos horta akompanha mos iha media sosial hodi orienta ekipa Prezidensia Republika liu husi Unidade Servisu Apoiu Sosial tuun direta ba fatin akontesimentu.
Ajuda husi Prezidensia Republika nee inklui fo apoiu urjensia ba kestaun moris loron-loron nian no asistensia imediata ba rekonstrusaun uma, maibe nee ekipa sei koopera ho instituisaun relevante sira hodi toma atensaun.
Unidade Servisu Soliedariedade ho ekipa sei kontinua monitoriza situasaun nee hodi koordena ho autoridade lokal sira atu halo asisténsia diak liu tan ba família nee.
Líder komunitariu no família sira hatudu agradesimentu boot ba Prezidente Republika Jose Ramos Horta ho nia ekipa, tanba prezensa direta no prontidaun ba fo solidariedade iha momentu kritiku.
(eme)
