DILI, STLTIMORLESTE.com – Prezidente Republika (PR), Jose Ramos Horta hatete, iha komemorasaun 28 Novembru simu lista husi Governu fo indultu ba prizioneiru nain 3, maibe la inklui ho eis Padre Dasbach.
Xefe Estadu dehan, nia fo indultu ba prizioneiru nain 3 nee tanba simu lista husi Governu.
“Dadur nain 3 neebe governu haruka, komentariu mai husi Primeiru Ministru, hatete konkorda dala tolu ba nain tolu no sira seluk nee lae. Nee duni agora daudaun hau nia office juridiku sira halo peskiza ba koalia ho ema balu atu haree, se informasaun neebe ONG balu temi kona-ba ema ida nee no ida neeba loos duni ka lae. Tanba hau la rona deit ONG balu hatete ida nee halo akuzasaun ida nee no la rona vitima sira rasik, hau nia ema rasik mak rona, laos deit ONG neebe koalia,” dehan Xefe Estadu ba jornalista sira, bainhira remata halao lansamentu Livru husi Primeiru Ministru, Kay Rala Xanana Gusmão iha salaun MNEK, Dili, Sesta (06/12/2024).
ONG tuir Horta laos amu Papa, laos Tribunal Rekursu, laos Prezidente Tribunal Distrital, ONG ida sira bele iha informasaun maibe informasaun nee sira dupla cek didiak, purtantu prosesu lao daudaun.
“Lista indultu neebe governu haruka nee Eis Padre Dasbach laiha, lae hanesan hau hatete nee tolu, governu konfirma deit nain tolu nee tanba hakerek iha neeba konkorda, konkorda, konkorda nain tolu, entaun tolu nee mak hau fo indultu,” katak PR, Horta.
Xefe Estadu hatete, Eis Padre Dasbach la tama iha lista indultu, lista governu, haruka nain tolu no Governu mos konkorda katak bele fo indultu, tanba governu hatete konkorda.
Iha biban nee Ministru Justisa, Sergio Hornai deklara katak, kona-ba prosesu indultu kompetensia tomak Prezidente Republika nian.
“Prosesu indultu prosesu komutasaun da pena nee kompetensia absoluta kompetensia propriu Prezidente Republika nian, konforme define ona iha ita nia Konstitusaun Republika iha artigu 85 alinha G,” dehan Ministru Justisa, Sergio.
(eme)
