DILI, STLTIMORLESTE.com – Prezidente Republika (PR), Jose Ramos Horta fo pose ba Karlito Nunes hodi asumi kargu nuudar Embaixador dahuluk Timor Leste (TL) ba Republika India.
Iha loron kuarta nee (14/05/2025) Prezidente Republika Jose Ramos Horta fo pose ba Karlito Nunes nuudar Embaixador Estraordinariu no Plenipotentiariu dahuluk husi Republika Demokratika Timor Leste ba Republika Índia.
Liu husi diskursu Prezidente dehan, Embaixador Nunes lori esperiensia barak ba nia knaar foun. Antes nee halao knaar nuudar Asesor iha Unidade Servisu Relasaun Internasional iha Gabinete Prezidensia (2024-2025) no nuudar Embaixador Estraordinariu no Plenipotentiariu ba dala 5 ba Nasoens Unidas (2021-2024), Nunes dedika ona nia karreira hodi avansa interese Timor Leste nian iha palku global.
Ninia esperiensia profisional inklui servisu distintu ho organizasaun internasional importante sira, inklui tinan 20 ho Institutu Republikanu Internasional, IRI (iha-neebe nia simu Premiu Judy Van Rest), Institutu Demokratiku Nasional, Organizasaun Internasional ba Migrasaun, no Misaun Nasoins Unidas nian iha Timor Leste.
“Nomeasaun Embaixador Karlito Nunes marka etapa importante ida iha ita nia relasaun diplomatika ho Índia,” hatete Prezidente Ramos Horta.
Prezidente Republika dehan Embaixador Nunes lori esperiensia, vizaun no dedikasaun neebe presiza hodi hametin lasu entre nasaun sira.
“Bainhira Timor Leste kontinua nia viajen ba integrasaun rejional no dezenvolvimentu ekonomiku neebe boot liu, ita-nia parseria ho Índia reprezenta ida husi ita-nia relasaun diplomatika neebe promete liu, Timor Leste no India mantein relasaun bilateral neebe forte dezde estabelese relasaun diplomatika iha iha 24 Janeiru tinan 2003, kolabora iha setor defeza, edukasaun, saude, agrikultura no kultural. Relasaun sai metin liu tan iha 2024, marka ho partisipasaun Prezidente Ramos-Horta iha Simeira Global Vibrante Gujarat iha fulan Janeiru, iha neebe Prezidente hasoru malu ho Primeiru-Ministru Modi hodi diskute kooperasaun iha petroleu, gas, dijitalizasaun, no interkambiu edukasional,” katak PR Horta.
Prezidente Ramos Horta fiar katak nomeasaun Embaixador Karlito Nunes sei eleva no hametin liu tan lasu amizade no kooperasaun entre nasaun rua nee, no halo ligasaun Dili-Delhi sai metin liu tan.
Iha biban nee Embaixador Timor Leste ba India, Karlito Nunee hatoo agradese ba Prezidente Republika nomos Primeiru Ministru no ministeriu Negosiu Estranjeiru neebe fo ona komfiansa ba nia hodi asume kargu nuudar Embaixador Timor Leste ba India.
“Primeiru lugar profundu agradesimentu ba Xefe Estadu Jose Ramos Horta, Xefe Governu no Ministru Negosiu Estranjeiru fo konfiansa nee mai hau atu halao misaun hanesan primeiru Embaixador ita boot sira hatene katak relasaun bilateral Timor Leste ho India hahu kedas 24 janeiru 2003 kleur tiha ona, hametin liu tan bainhira exelensia Primeiru Ministru Xanana Gusmão ho Primeiru Ministru India halao enkontru iha simeira durante asean iha Jakarta koalia oinsa hametin relasaun,” dehan Embaixador.
Embaixador dehan, ohin simu ona pose hotu ona sei iha servisu administrasaun balun ho Ministeriu Negosiu Estranjeiru depois rua ka tolu tan bele aranka ona ba India.
Prezidente Republika fo Pose ba Karlito tuir Dekretu Prezidente Republika numeru 38/2025 Nomeasaun Karlito Nunes ba kargu Embaixador Estraordinariu no Plenipotensiariu Republika Demokratika Timor Leste ba Republika Índia.
Tuir Konstituisaun Republika Demokratika Timor Leste fo ba Prezidente Repiblika kbiit iha ambitu relasaun internasional nian atu nomeia no ezonera embaixador sira, reprezentante permanente sira no enviadu estraordinariu sira, tuir proposta hosi Governu, tuir termu sira hosi ninia artigu 87, alínea b.
(eme)
