DILI, STLTIMORLESTE.com – Prezidensia Republika (PR) hamutuk ho Governu fahe prendas Natal ba dadur sira iha prizaun Bekora, inklui mos pasiente sira iha Hospital Nasional Guido Valadares (HNGV).
Prendas Natal nee fahe husi Visi Primeiru Ministru, no Ministru Koordenador Asuntu Ekonomia, no Ministru Turizmu no Ambiente, Francisco Kalbuadi Lay, Ministru Justisa Sergio Hornai, Prezidensial Republika reprezenta husi Asesor Prinsipal, Quintiliano Moniz, Diretora Jeral Administrasaun Prezidensia Republika, Aida Maria dos Santos.
Jestu solidariedade Prezidensia Republika hamutuk ho Governu nian nee, estende ninia inisiativa anual Natal do Povo ou Natal Povu nian ba dadur sira iha Prizaun Bekora nomos pasiente sira iha HNGV.
Iha biban nee, Asesor Prinsipal Prezidensia Republika, Quintiliano Moniz ba jornalista sira iha prizaun Bekora, Kinta nee (19/12/2024) hatete, objetivu fahe prendas Natal ba dadur sira iha prizaun Bekora, inklui mos pasiente sira iha Hospital Nasional Guido Valadares nee kontinuasaun ou programa Natal ho Povu.
“Objetivu mai vizita nee mak kontinuasaun ba programa ida Natal ho povu. Iha Natal ho povu nee mak iha atividade ida asaun karitativa ida ba feira, ida ba Natal hamutuk. Asaun karitativa nee rohan ba orsida loraik iha Klibur Domin Tibar depois hein 22 ba Natal hamutuk ho povu. Natal hamutuk ho povu nee laos ba deit ema iha liur, maibe ema neebe kloot nee mak asaun karitativa, liu-liu ba orfonatu sira, ba ho kbiit natoo sira, ba ema prizaun ho sira neebe moras nee mak ita fo prezente Natal ba sira,” dehan Quintiliano.
Asesor nee dehan, prendas Natal nia fo tuir rekomendasaun husi Guarda Prizaun sira buat neebe mak la autoriza labele lori ba, tanba nee mak oferese deit mak kona-ba nesesidade bazika sira.
Nunee mos iha HNGV fo aifuan sira maibe laos ai-haan importasaun, tanba Prezidente Republika hatete tenke fo aifuan lokal, entaun iha aifuan mak ainanas, hudi.
Entretantu Visi Primeiru Ministru no Ministru Koordenador Asuntu Ekonomia, no Ministru Turizmu no Ambiente, Francisco Kalbuadi Lay hatete, ohin hamutuk ho ekipa fahe prendas Natal simbolu domin ba povu.
“Ohin hau hamutuk ho Ministru Justisa no mos ekipa tomak husi Palasiu Prezidensial Asesor Quintiliano, Diretor Jeral, ho sira lubuk ida lori Prezidente Republika no mos maun boot Kay Rala Xanana Gusmão hanesan Primeiru Ministru atu hatudu deit domin neebe programa ida ita bolu Natal hamutuk ho povu, neebe atividade lubuk ida ami halao tiha ona, ohin liu husi Hospital Nasional Guidu Valadares (HNGV) mai too prizaun Bekora loraik sei kontinua iha Klibur Domin Tibar,” katak nia.
Nia dehan, remata programa ida Natal hamutuk povu nee, iha han festa ida neebe sei mai 22 entre governu ho Prezidente Republika no povu sira hotu. Hanesan mos Amu Papa Francisco nia liafuan husi akordu neebe iha mundu tomak katak fraternidade umana, labele haree ohin loron se-se maibe atu selebra loron boot liu ba Santu Natal nian.
(eme)
