DILI, STLTIMORLESTE.com – Prezidensia Republika halo kolaborasaun ho IX Governu Konstitusional neebe lidera husi Primeiru Ministru (PM) Kay Rala Xanana Gusmão, atu garante sistema legal no administrasaun nasaun nia.
Tuir informasaun neebe STL asesu iha Sesta nee (06/02/2026) katak, Prezidensia Republika halo kolaborasaun ho IX Governu Konstitusional atu garante governasaun estratejika, justisa no reforma.
“Prezidensia no Governu servisu hamutuk hodi garante sistema legal no administrativu nasaun nian, prontu atu hasoru dezafiu sira iha 2026,” haktuir husi Komunikadu.
Koordenasaun semana nian ho PM Xanana Gusmão iha loron 8, 15, 29 Janeiru 2026, enkontru regular entre Prezidente no Primeiru Ministru garante koordenasaun ba seguransa nasional, resposta ba surtu dengue, no implementasaun estratejika ba sistema orsamentu bazeia ba programa hodi kaba ho korrupsun.
Reforma Judisiaria no Funsaun Publika Prezidente simu informasaun husi Tribunal Rekursu kona-ba rekrutamentu juis foun sira no estabelesimentu Tribunal Supremu Justisa iha final 2026. Simultaneamente, Prezidente koalia ba ninia funsionariu sira, hodi husu tranzisaun ba meritokrasia no eselensia profisional hodi prepara ba Timor Leste nia Prezidensia ASEAN iha 2029.
Nunee mos liga ho Investimentu iha Teknolojia “Junção” iha loron 16 Janeiru 2026, Prezidente simu informasaun kona-ba investimentu estratejiku iha setor agrikultura, liuliu introdusaun teknolojia “Junção” ba hahan animal sustentavel, neebe inklui formasaun no bolsa estudu ba estudante timoroan sira iha Xina.
Janeiru 2026 mak fulan ida ho momentum neebe la para. Hodi ekilíbriu entre diplomasia boot iha Davos no vizita Albanese nian ho diplomasia hodi vizita eskola rural no orfanatu sira.
Prezidente Jose Ramos Horta reafirma katak medida lo-loos husi susesu nasional mak bem-estar husi ninia sidadaun sira neebe vulneravel liu.
“Wainhira ita lao ba oin iha Tinan ba Asaun, ida-nee Prezidensia kontinua foku ba objetivu rua, integrasaun rejional no reforma interna. Ita tama ba Fevereiru ho fuan neebe forte, unidade liu husi kultura dialogu nian no kompromisu hamutuk ba Timor Leste ida neebe prosperu, justu, no pozitivu ba natureza,” dehan Prezidente Republika Jose Ramos Horta.
Aleinde nee buletin informativu ida-nee reflete atividade no deklarasaun ofisial sira husi Prezidente Republika durante fulan Janeiru 2026.
(eme)
