DILI, STLTIMORLESTE.com – Prezidensia Republika (PR), hamutuk ho Governu liu husi Ministeriu Juventude no Desportu Arte no Kultura (MJDAK) ofisialmente lansa ona Maratona Internasional Dili 2025.
Iha iha loron Sesta nee (01/08/2025) ho apoiu solidu husi Prezidensia Republika no Governu, Komisaun Organizadora ba Maratona Internasional Dili, lideradu husi Nelio Isaac Sarmento, Ministru Juventude, Desportu, Arte no Kultura halo lansamentu ofisial ba Maratona Internasionál Dili 2025.
Dili Maratona Prezidente Republika José Ramos Horta mak sai hanesan patronu ba eventu nee, sublina nia kompromisu ho unidade nasional, saude publika no solidariedade internasional.
Organizador sira hotu haksolok atu fo sai katak rejistu ba Maratona Internasional Dili 2025 sei loke ofisialmente iha fulan Agostu tinan 2025. Eventu neebe ema hotu hein, marka ona ba loron Sabadu, iha 11 Outubru 2025, ho linha inísiu no final neebe marka ona iha fatin ikonika Palasiu Prezidensial Nicolau Lobato.
Maratona Internasional Dili kontinua sai simbolu unidade nasional nian, hodi promove saude, fitness no espíritu vibrante Timor Leste nian iha palku global.
Eventu tinan ida nee nian lori tema signifikativu, “Run for Palestine” ida neebe partisipante sira sei espresa solidariedade no hasae konxiensia ba pas no justisa.
Iha biban nee Ministru Nelio Isaac liu husi konferensia hatete, sente kontente hamutuk ho Prezidensial Republika lansa Maratona Internasional Dili.
“Ami sente kontente tebes atu loke rejistu iha fulan oin ba saida mak promete ona atu sai ita nia Maratona Internasional Dili neebe mak fo impaktu makaas liu ikus mai,” afirmaNélio Isaac Sarmento..
Nia hatete, tinan ida nee sente orgulhu atu introdus kategoria premiu tolu kategoria ASEAN, Timor Leste no Para-atleta ba feto no mane sira.
“Ho kategoria unika tolu nee ami sublina ami nia kompromisu atu rekonhese exelensia atlétika husi Timor Leste no rejiaun ASEAN neebe luan liu. Ami enkoraja aspirante koredor sira hotu, husi maratonista sira neebe iha esperiensia too korredor sira ba dahuluk, too prepara sira nia kandidatu sira hamutuk ho ami ba eventu estraordinariu ida-nee,” katak nia.
Maratona Internasional Dili 2025 sei iha korrida oioin neebe komprensivu hodi akomoda nivel partisipasaun hotu-hotu, Maratona Kompletu (Full Marathon) Kursu ida neebe dezafiante ho distansia 42.195 km ba korredor elite no esperiente sira.
Meia Maratona (Half Marathon) Korrida ida neebe popular ho distansia 21.0975 km neebe oferese teste substansiál ida ba rezisténsia.
Eventu Para-Atleta sira (Para-Athletes Event) Kategoria dedikadu ida neebe asegura inkluzividade no selebra realizasaun sira hosi atleta sira ho defisiensia.
Fun Run Korrida ida neebe badak liu, laos kompetisaun maibe perfeitu ba família sira, belun sira, no membru komunidade sira atu goza (enjoy) atmosfera festiva.
Partisipante sira sei iha oportunidade unika atu halai liuhosi rota seníku sira Dili nian, hodi koko no haree kultura neebe riku no tasi-ibun neebe furak, enkuantu kontribui ba kauza ida neebe defende valor umanitariu sira.
Detalhu sira seluk kona-ba data rejistu lo-loos, detalhu premiu sira, rota sira korrida nian no lojístika loron eventu nian sei disponibiliza iha website ofisial Maratona Dili nian no liu husi kanal sira iha mídia sosiál.
Kona-ba Maratona Internasional Dili Maratona nuudar eventu desportivu anual neebe halao iha Dili, Timor Leste, ho objetivu atu promove saude, envolvimentu komunidade, no turizmu internasional. Ida nee oferese kategoria korrida oioin hodi akomoda partisipante oin-oin no serve hanesan plataforma ida ba solidariedade nasional no internasionál.
(eme)
