DILI, STLTIMORLESTE.com – Prezidente Republika (PR), Jose Ramos Horta hamutuk ho Governu neebe lidera husi Primeiru Ministru, Kay Rala Xanana Gusmão sei hametin planu estratejiku tinan 2026, hodi define prioridade defeza no loke tinan judisiaria formal.
Tuir komunikadu neebe STL asesu husi media PR Segunda (05/01/2025) hatete, Prezidensia Republika hamutuk ho Governu sei servisu hamutuk hodi hametin planu estratejiku sira neebe planea ona, no loke dala uluk tinan judisiaria hametin planu estratejiku sira.
“Prezidensia kontinua sai sentru gravidade ba orgullu nasional no kompaixaun sosial. Bainhira tinan nee remata, Prezidente hamutuk ho IX Governu Konstitusional hametin planu estratejiku ba 2026 defini prioridade defeza, loke ba dala uluk Tinan Judisiariu formal, no asume prezidensia temporaria CPLP nian,” haktuir komunikadu neebe STL asesu.
Ekipa Unidade Servisu Komunikasaun Sosial husi Prezidensia onra tebes atu fahe pontu prinsipal sira husi fulan ida neebe selebra pasadu, no dalan ba 2026. Espíritu Tempu nian Natal ho Povu Solidariedade Komunitaria
Prezidensia transforma tempu festa nian sai kampana kmaan nasional ida, hodi asegura katak ksolok Natal nian too iha area remota no vulneravel liu iha Timor Leste.
Aleeude nee foin lalais Eventu Prinsipal Natal ho Povo Iha selebrasaun vibrante ida iha Palasiu Prezidensial Nicolau Lobato, Prezidente hamutuk ho Primeiru Ministru Xanana Gusmão sai uma-nain ba festival família nian neebe hatudu aprezentasaun kultural, dokumentariu kona-ba serbisu iha area rural, no fahe prezente ba sidadaun liu nain 5,000, inklui labarik, feto-faluk, no ema ho nesesidade espesial.
Nunee mos iha selebrasaun hodi simu tinan foun Primeiru Ministru Kay Rala Xanana Gusmao hatete tinan 2026 tenke sai tinan atu harii no kura hodi husu ba nasaun atu unidade iha objetivu hanesan.
“Mai ita rai hela buat neebe ladun diak iha kotuk mai ita lori fali esperansa pas no domin ba tinan 2026 tempu atu haksolok mak agora,” dehan Primeiru Ministru Kay Rala Xanana Gusmão.
Nunee mos iha loron veteranus Prezidente Republika hamutuk ho Governu fo Onra ba Patrimoniu loron Eroi Nasional no Aniversariu ba dala 50 Invazaun nian, iha biban nee Prezidente husu hotu hotu atu iha komprimisiu nasional hodi ultrapasa dezefiu modern sira.
Hateke ba futuru, Prezidente husu kompromisu nasional foun ida hodi ultrapasa dezafiu modernu sira, inklui pobreza multidimensional, nutrisaun ladiak, no analfabetizmu.
Xefe Estadu fo mos sai importansia husi unidade nasional nuudar Timor-Leste prepara ba integrasaun rejional neebe klean liutan liuhusi ASEAN no kontinua hametin relasaun fraternal ho vizinu Indonezia.
Kona-ba ninia mandatu rasik, Prezidente reafirma ninia dedikasaun hodi serbí povu ho haraik-an no transparensia, no promete atu hasae kooperasaun institusional entre Governu, Parlamentu, no Tribunal hodi garante nasaun ida neebe prosperu no inkluzivu liutan.
Dezembru sai tempu ba reflesaun istorika klean wainhira nasaun marka tinan 50 dezde invazaun 1975 ho foku ba unidade no rekonsiliasaun.
Jornalista: Emerenciana Pinto
Editora: Carme Ximenes
