DILI, STLTIMORLESTE.com – Prezidensia Republika (PR) no Governu organiza marxa lao ain husi Palasiu Prezidensial ba Rotunda Prezidente Nicolau Lobato Comoro hodi selebra Loron Nasional Heroi.
Iha biban nee, Prezidente Republika (PR) Jose Ramos Horta liu husi diskursu iha Aeroporto Internasional Nicolau Lobato, Kuarta (31/12/2025) hatete, ho ondra ba luta nain sira neebe sakrifika sira nia aan hodi lori rai nee ba hetan ukun rasik aan.
“Hakruuk ba heroi sira hotu-hotu neebe fo sira nia vida ba rai ida nee hetan ukun rasik aan, independente, soberania, unidade territorial, integridade territorial, ba sira hotu-hotu neebe la hamutuk ho ita ohin, no ba sira hotu-hotu neebe lakon sira nia vida ba rai ida nee,” dehan Prezidente Republika.
Prezidente Republika hatete ohin halo omenajen ba sira neebe ho brani aten boot entrega aan total ho sira nia vida ba kauza boot libertasaun da patria, sira mate ba patria ida nee no sira hotu hotu neebe moris, moris iha liberdade.
Xefe Estadu dehan hakruuk ba joven sira neebe iha 1974-75 mehi ba Liberdade no indepedensia, Nicolau lobato Komandante Xefe FALINTIL, lider rezistensia monu iha Mindelo 31 dezembru, hotu-hotu hakruuk no omenajen ba eroi sira neebe tanba nain Maromak mak hakarak no sira neebe ohin loron sei moris nafatin hamutuk serbi patria ida nee.
Nia hatutan, hanoin ba kotuk nee hanesan aprende, hanesan estuda hametin liu tan komitmentu ba mehi ba heroi sira neebe mate husik ba povu TL Timor Leste ida ke livre soberanu riku.
“Ita nia istoria nakonu ho sakrifisiu, entrega aan total laiha duvida, la hein fatuk ida neebe iha dalan, dalan neebe ita nia heroi sira lao nee hanesan lisaun korajen ho responsabilidade, Nicolau Lobato hatete libertasaun nee laos hanesan fo saugate, nee hanesan konkista ida,” dehan PR Horta.
Iha selebrasaun Loron Heroi nee partisipa husi Prezidente Republika Jose Ramos Horta, membru governu, membru Parlamentu Nasional, eis primeiru Ministru Mari Alkatiri, Korpu Diplomatiku, no sidadaun sira.
Iha ambitu selebrasaun Loron Nasional ba Heroi Sira, Prezidente Republika Jose Ramos Horta hakat hodi kaer liman fali ho eis Primeiru Ministru Mari Alkatiri. Momentu nee akontese hafoin Xefe Estadu remata serimonia tau ai-funan no fo omenajen ba Saudozu Nicolau Lobato nia estatua.
Hafoin fo omenajen ba heroi nasional nee, PR Ramos Horta lao hakat hodi kumprimenta membru Governu sira no mos Prezidente Tribunal Rekursu (PTR) no kontinua lao kaer liman ho eis Primeiru Ministru Mari Alkatiri.
Jornalista: Emerenciana Pinto
Editor: Xisto Mendonça
