DILI, STLTIMORLESTE.com – Prezidente Republika (PR), Jose Ramos Horta kontinua habelar sosializasaun dokumentus Fraternidade Umana ba sira.
Prezidente Republika Jose Ramos Horta iha inisiativa atu halo sosializasaun ba dokumentu Fraternidade Umana kontinua habelar iha Timor Leste tomak, ho atividade foin lalais nee foka ba eskola sira iha Munisípiu Bobonaro.
Ekipa Prezidensia Republika neebe lidera husi Asesor Asuntu Fraternidade Umana, Nuno Horta halao sesaun iha instituisaun ensinu oin-oin iha Postu Administrativu Balibo no Atabae, inklui EBC 3° Balibo, EBF 7 de Setembru, Eskola Sekundaria Publika Balibo Five, EBC No. 3 Atabae, no ESTV Atabae.
Esforsu sosializasaun subliña tema “Horisehik hanesan paixaun ida, ohin hanesan kompaixaun, loron aban sei sai kultura ida.
” Ho objetivu atu haburas espíritu komunitariu no moris kompaixaun nian entre estudante sira. Inisiativa ida nee tuir realizasaun istoriku Timor Leste nian nuudar nasaun dahuluk globalmente neebe adota dokumentu Fraternidade Umanu liu husi rezolusaun parlamentar iha loron 13 fulan Maiu tinan 2022, ho planu atu hatama iha kurríkulu nasional,” dehan PR tuir Komunikadu neebe STL asesu husi media PR (13/05/2025).
Aleinde nee dokumentu neebe orijinalmente asina husi Papa Francisco no Imam Ahmed Al-Tayyeb iha Fevereiru 2024 iha Abu Dhabi, reprezenta kompromisu interrelijiozu ida ba pas no komprensaun mutua neebe maka Prezidente Ramos Horta defende durante nia mandatu tomak.
Sosializasaun kobre ona eskola barak iha munisípiu sira hanesan Aileu, Ainaro, Manufahi, Lautem, Baukau, Manatuto, Bobonaro, Liquiça, Covalima, Ermera no Oekusi, inklui Atauro, Prezidensia Republika planeia atu habelar sosializasaun ba eskola seluk sira no potensialmente ba komunidade sira iha nivel Aldeia, hodi reforsa kompromisu Timor Leste nian atu harii kultura fraternidade no koezisténsia pás nian entre sidadaun sira.
(eme)
