DILI, STLTIMORLESTE.com – Prezidente Republika (PR), Jose Ramos Horta haforsa parseria ho Estadu Unidus Amerika, iha Roo funu U.S.S Cincinnati Leten, Simu Ezersísiu Carat 2025.
Prezidente Republika, Jose Ramos-Horta, partisipa iha serimonia resepsaun kalan nian ida iha ro-funu Estadus Unidus nian, U.S.S. Cincinnati, neebe vizita hela Portu Dili, hodi simu ofisialmente hahu ezersísiu naval Kooperasaun Prontidaun no Treinu iha Tasi (CARAT) 2025.
Prezidente Republika hamutuk ho Komandante Andrew Recame no Enkaregadu Negosius EUA nian, Bruce Begnell, hodi selebra parseria seguransa neebe metin entre Timor-Leste no Estadus Unidus.
Prezidente Republika Jose Ramos Horta liu husi diskursu iha Roo funu U.S.S Cincinnati Leten, Simu Ezersísiu Carat 2025 iha Porto Dili Segunda kalan 22/09/2025 hatoo boas-vindas ba tripulasaun ro nian, hodi haforsa lasu pesoal no klean entre nasaun rua nee no sublina katak ezersísiu konjuntu nee nuudar fatuk angular ba kompromisu mutuu kona-ba seguransa marítima no estabilidade rejional iha Indo-Pasífiku.
Iha ninia diskursu, Prezidente Republika, Ramos-Horta sublina benefísiu konkretu sira hosi relasaun defeza bilateral, hodi revela ninia esforsu lobby diretu no persistente ho ofisial aas Estadus Unidus nian sira, inklui Sekretariu Defeza, atu bele manten no aumenta prezensa Seabees husi Forsa Naval EUA nian iha Timor-Leste.
Prezidente fo-foun Seabees sira ba sira-nia serbisu fantastiku no kontribuisaun vital ba dezenvolvimentu nasional, hodi hatudu parseria nia impaktu pozitivu no diretu ba povu Timor. Bazeia ba ninia esperiensia pesoal barak neebe moris iha Estadus Unidus, nia hatoo apresiasaun klean ba povu Amerikanu no reafirma valor hosi kooperasaun neebe kontinua.
Haree ba oin, Prezidente espresa ninia apoiu makaas atu halo ezersísiu CARAT sai eventu regular tinan-tinan hodi hasae liutan kapasidade F-FDTL no hametin interoperabilidade. Nia konklui hodi hateten katak kada mariñeiru Estadus Unidus nian neebe vizita Timor-Leste sei sai embaixador boa-vontade ba nasaun bainhira sira fila-fali ba uma, hodi haburas komprensaun diak liutan no hametin lasu amizade.
Prezidente nia prezensa no diskursu reafirma Timor-Leste nia kompromisu estratejiku ba parseria nuudar komponente vital ida ba ninia polítika esterna no seguransa nasional.
Jornalista: Emerenciana Pinto
Editora: Carme Ximenes
