DILI, STLTIMORLESTE.com – Prezidente Republika (PR), José Ramos Horta halao abertura ba festival ai horis, ai-haan no arte neebe ho tema “Go Green, Buy Local”, iha Palasiu Prezidensial, Nicolau Lobato, Dili.
Iha loron Kinta kalan Prezidente Republika halo abertura ba festival ai horis, ai-haan no arte ho tema “Go Green, Buy Local” iha Palasiu Prezidensial selebrasaun loron tolu ba empreendedorizmu feto Timoroan no sustentabilidade ambiental, neebe halao iha Palasiu Prezidensial Nicolau Lobato husi loron 14 too 16 fulan novembru tinan 2024.
Tuir observasaun neebe mak jornalista STL hetan iha Kinta (22/11/2024), antes halo lansamentu Prezidente Republika halao vizita uluk produtu neebe inan sira faan iha Palasiu, Festival organiza husi Unidade Empoderamentu Ekonomiku Feto nian (EEW), hatudu vendedor feto lokal sira neebe hatudu produtu artezanatu, ai-horis no ai-haan tradisional sira.
Objetivu husi festival nee atu hasae vizibilidade ba feto emprezaria sira. Kria oportunidade sira ba envolvimentu entre vendedor no kliente. Ajuda feto sira estabelese sira nia marka negosiu. Rekonhese no selebra feto Timoroan sira nia susesu. Promove sustentabilidade ambiental no konsiensia konaba resiklajen.
Eventu nee hahu ho esperiensia degustasaun hahan espesial husi grupu vendedor ai-haan Timor Street Food, neebe oferese hahan tradisional Timor nian ba distintu bainaka sira, inklui reprezentante governu, parseiru dezenvolvimentu, no membru korpu diplomatiku sira.
Destake sira husi festival loron tolu nian inklui Espozisaun ai horis no arte nian neebe hatudu feto emprezaria lokal sira. Kompetisaun ba exibisaun kriativu diak liu no aprezentasaun tenda nian. Oportunidade interkambiu kultural ho embaixada sira neebe partisipa.
Atividade interativu inklui sorteiu ba pemiu no rifa. Hatudu pratika negosiu sustentavel sira. Vendedor ai-haan no bebida lokal sira.
“Forsa husi ita nia nasaun iha inovasaun no determinasaun husi ita-nia feto emprezaria sira, no sira-nia kompromisu ba pratika negosiu neebe sustentável”, tenik Prezidente Republika, Ramos Horta.
Xefe Estadu hatete, Festival ida nee reprezenta oportunidade uniku ida atu hatudu talentu inkrível sira husi feto negosiu lokal sira enkuantu promove konsiensia ambiental. Hodi halibur komunidade nia forsa kriativu sira ho advogadu ambiental sira, harii futuru ida neebe sustentavel no ekuitativu liu ba Timor Leste.
Inisiativa ida nee alina ho Prezidente nia kompromisu atu apoia feto sira nia empoderamentu ekonomiku enkuantu promove sustentabilidade ambiental no prezervasaun kultural.
(eme)
