MANUFAHI, STLTIMORLESTE.com – Prezidente Republika (PR), Jose Ramos Horta halao enkontru ho inter-jerasional, oinsa prepara jerasaun ba futuru Timor Leste.
Prezidente Republika, Jose Ramos Horta lidera Dialogu Inter-jerasional neebe foka ba forma futuru Timor Leste nian. Eventu neebe realiza iha Luak, Same, halibur lider sira, akademiku no reprezentante juventude sira hodi envolve iha diskusaun konstrutivu kona-ba polítika publika inkluziva no dezenvolvimentu nasional.
Enkontru signifikativu ida nee ho objetivu atu halo ponte ba lakuna jerasional sira, fornese plataforma ida ba juventude Timor Leste nian atu fahe ideia inovativu sira kona-ba dezenvolvimentu sosial, ekonomiku no polítiku.
Dialogu nee promove diskusaun konstrutivu kona-ba polítika publika inkluziva no hametin papel jerasaun foun iha kontribuisaun ba mudansa pozitiva, promove konsensu no dezenvolve solusaun komun ba futuru nasaun nian.
Prezidente Ramos Horta trasa ninia vizaun ba Timor Leste no modelu lideransa neebe presiza atu alkansa dezenvolvimentu sustentavel. Ninia mensajen xave sublina reforma edukasaun nian.
Bainhira remata halo diskusaun, Prezidente Republika Jose Ramos Horta ba jornalista sira iha Salun Luak Same, Sesta (21/03/2025) hatoo agradese ba konvite husi Movimentu Timor Avante (MOTIVA) neebe lidera husi Doutor Fidelis Leite Ho Rui Ajoujo neebe hola parte iha Movimentu Timor Avante (MOTIVA).
“Motiva konvida hau hodi koalia kona-ba futuru Timor Leste nia, futuru ke hahu kleur tiha ona, importante diak tebes halo balansu no balansu neebe kritiku la signifika atu kritika deit maibe kritiku nee importante tebes para haree instituisaun, lideransa, saida mak lao diak no saida mak falha tenke haree mos futuru ita nia konstituisaun, tanba ita nia konstituisaun mos hatete bainhira 25 anos bele halo amandamen konstitusional, se konstitusional serve duni ka lae? Tanba konstituisaun nee mos kontribui ba problema iha rai laran, hanesan rai balu iha Afrika no Guine Bissau, problema boot tanba iha antiguidade iha konstituisaun,” katak PR Horta.
Prezidente Republika hatete, halo balansu 25 anos de indepedensia 50 anos proklamasaun ba oin tenke halo balansu ida matenek no total integridade ho honestidade, se bainhira la halo ho honestidade ho balansu ho politizasaun ho bosok entaun la hatene saida mak atu halo ba oin.
Iha biban nee Prezidente MOTIVA, Fidelis Leite Magalhaes hatoo agradese no obrigadu ba Prezidente Republika nomos partisipante seluk neebe ho laran luak hodi bele partisipa iha eventu dialogu inter jerasional iha luak.
Nia dehan, atividade nee lao tanba inisiativa husi MOTIVA nia atu divulgaviza kona-ba trans jerasional atu fasilita iha duni konversa ida dialogu nasional entre jerasaun fundador nia nomos jerasaun sira tuir mai, nomos jerasaun neebe mak iha ona esperiensia ukun iha governasaun iha tinan barak nia laran hafoin ukun rasik aan nomos ami sira neebe foinsae,” katak Fidelis.
Nunee mos Prezidente Autoridade Munisipiu Manufahi, Luis Marcal Tavares hatoo agradese ba MOTIVA hodi deside ona Manufahi nuudar destinadu hodi halo dialogu inter jerasional, tanba iha tinan rihun ida ba kotuk Manufahi sai primeiru ba Timoroan, maske la dehan katak primeiru liu mak Manufahi maibe istoria neebe rona katak funu revolusaun hahu husi Manufahi husi eroi boot Boa Ventura.
“Atu dehan Manufahi ami simu ema hotu-hotu, simu entidade hotu-hotu, parte hotu-hotu neebe mak iha hanoin ba rai ida nee ba nasaun nee atu hadia povu ida nee hodi fo benefisiu ba povu no rai ida nee, Manufahi sei la nonok sei fo vontade tomak matenek tomak neebe iha hodi apoiu ba dezenvolvimentu povu no rai ida nee,” katak nia.
Eventu nee diskursu badak husi Visi Ministru Asuntus Parlamentares, Aderito Hugo, Prezidente Autoridade Munisipal Manufahi, Luis Marçal Tavares no Reitor IBTL Antonio Pedro Marçal. Brigida Soares aprezenta kona-ba “Timor Leste husi 2020-2024 konkista, dezafiu no fator impedimentu ba futuru, estratejia mitigasaun, hodi fornese kontestu krítiku ba diskusaun sira.
Dialogu inter jerasional aprezenta distintu diskusaun painel moderadu husi Aniceto Guro Berteni Neves, ho Prezidente Ramos Horta hamutuk ho lider proeminente Rui Maria de Araujo, Fidelis Leite Magalhães. Painel ida nee esplora Futuru Timor-Leste neebe Diak, Dezenvolvimentu Estadu Timor Leste nian liu husi Lideransa Transformativa iha Futuru.
Dialogu Inter jerasional neebe organiza husi Movimentu Timor Avante (MOTIVA), hametin kolaborasaun interjerasional, fasilita transferensia konesimentu husi polítiku senior sira ba líder foinsae sira, no promove foti desizaun inkluzivu neebe integra perspetiva juventude nian iha planeamentu dezenvolvimentu no prosesu polítika sira.
(eme)
