DILI, STLTIMORLESTE.com – Prezidente Republika (PR), Jose Ramos Horta hasoru malu ho Ministra Australia ba Dezenvolvimentu Internasional Australia, hodi hametin relasaun bilateral.
Iha hasoru malu nee Prezidente Republika Jose Ramos Horta hatoo Benvindu ba Ministra Australia ba Dezenvolvimentu Internasional Australia Anne Aly MP, iha hasoru malu hodi diskute hamutuk kona-ba relasaun bilateral entre Timor Leste ho Australia.
Ministra Dezenvolvimentu Internasional Australia hasoru Prezidente iha kuarta lokraik (06/08/2025) iha Palasiu Prezidensial Nicolau Lobato. Enkontru ida nee destaka parseria neebe dura entre Timor Leste no Australia, ho diskusaun sira neebe foka ba objetivu dezenvolvimentu partilladu, kolaborasaun ekonomika, no Timor Leste nia adezaun ba ASEAN.
Vizita ida nee akontese hamutuk ho Konferensia Ekonomika no Negosiu Timor Leste–Australia daruak (TLAUCON 2025), neebe halao iha loron 6–8 fulan-agostu iha Sentru Konvensaun Dili. Ko-host husi Governu Timor Leste no Australia, ho objetivu atu hametin lasu ekonomiku liu husi promove investimentu iha setor xave sira, inklui agrikultura, turizmu, manufatura, no rekursu mineral sira.
Iha biban nee Prezidente Ramos Horta hatoo agradesimentu ba Australia nia apoiu neebe metin ho Timor Leste dezde uluk too ohin loron.
“Australia sai nuudar parseiru ida neebe metin iha Timor-Leste nia viajen ba estabilidade no prosperidade. Enkuantu ita prepara atu tama ba ASEAN, ita valoriza kooperasaun kontinua iha komersiu, investimentu, no ligasaun povu ho povu neebe sei dudu kresimentu sustentavel ba ita-nia nasaun rua nee,” dehan PR Horta.
Australia no Timor Leste iha amizade kleur ona, neebe hametin liuhusi ligasaun forte entre povu ho povu.
Dezde Timor Leste nia independensia iha tinan 2002, Australia sai nafatin ninia parseiru dezenvolvimentu no seguransa neebe boot liu, Nasaun rua nee ativamente parseiru iha kooperasaun sira iha setor oioin, inklui Dezenvolvimentu, Diversifikasaun Ekonomika, programa Mobilidade Traballu Pasífiku Australia (PALM), projetu infraestrutura boot sira, Edukasaun, Seguransa no Defeza, ligasaun entre povu, apoiu baTimor Leste nia membru OMK no adezaun ba ASEAN.
(eme)
