DILI, STLTIMORLESTE.com – Prezidensia Republika (PR) hamutuk ho Autoridade husi Loes sei realiza seminariu siklu refleksaun ba tinan 50.
Prezidensia Republika hamutuk ho autoridade sira iha Loes, Munisípiu Likisa, sei halo atividades komunidade no publika nian ho seminariu siklu refleksaun husi tinan 50 invazaun TL ho tema “unidade nasional maka garantiza sustentabilidade estadu no nasaun”.
Tuir informasaun neebe STL asesu iha Kinta (04/12/2025) katak, atividade nee sei halao iha loron 6 Dezembru ho atividade komunitariu no kultura.
Iha loron 6 Dezembru nee sei halao programa hanesan kuda ai-oan, misa agradesimentu hodi hanoin hikas heroi nasional sira, inklui halai taru, kompetisaun dada tali, halai karon, loke ofisial feira komunitaria, animasaun no konsertu musika.
Nunee mos iha loron 7 Dezembru sei iha seminariu no lansamentu no inisiativa sosial no halao seminariu siklu refleksaun, reuni veteranus, autoridade lokal, akademiku, reprejentantís sosiadade sivil, membru korpu diplomatiku no komunidade.
Seminariu sei fo atensaun ba unidade nasional hanesan fundu atu garante sustentabilidade Estadu no Nasaun, hametin memoria istorika no koesaun sosial.
Programa loron 7 inklui mos distribuisaun kabaz natal ba família neebe presiza, entrega premiu ba manan nain sira husi atividade komunitaria, haree filmu dokumentariu kona-ba tinan 1975, konsertu no animasaun kultural.
Atividade loron rua nee objetivu atu hametin memoria istoriku, promove partisipasaun komunidade no reafirma kompromisu kolektivu ho dame, dezenvolvimentu no unida
de nasional.
Jornalista: Emerenciana Pinto
Editora : Domingas Gomes
