DILI, STLTIMORLESTE.com – Iha loron Segunda (22/09/2025) Prezidente Republika (PR), Jose Ramos Horta hasoru malu ho delegasaun ida husi Xina hamutuk ho nain ba kompanhia Aero Dili, Lourenço Oliveira diskute kona-ba expansaun ligasaun aerea direta entre Timor Leste no Xina.
Enkontru nee serve nuudar akompanamentu signifikativu ba esforsu diplomatiku susesu nian husi Prezidente iha tinan kotuk ho lideransa Xina, neebe nuudar fator importante tebes hodi estabelese rute inaugural Dili-Xiamen.
Prezidente Republika haree rute aereu diretu nee nuudar inisiativa estratejika ida atu haforsa relasaun bilateral, haburas koneksaun povu-ba-povu, no loke dalan foun ba kooperasaun ekonomika.
Diskusaun nee sublina susesu real husi servisu aereu ezistente, neebe opera ona ho konsistente ho volume pasajeiru neebe aas, hodi kontribui diretamente ba setor turizmu Timor Leste nian.
Hodi harii bazeia ba momentu nee, diskute ona planu sira atu aumenta frekuensia semo nian no lansa rute foun ida ba Fuzhou.
Prezidente Republika, Horta enfatiza katak transporte aereu neebe fiavel no aumenta nuudar asuntu krusial hodi dada investimentu, fasilita viajen negosiu, no halo Timor-Leste sai destinu ida neebe asesu fasil liu ba vizitante internasional sira, hodi alinea ho objetivu nasaun nian ba diversifikasaun ekonomika.
Inisiativa ida-nee nuudar komponente xave husi vizaun jeral Prezidente nian atu hasae konektividade global no rejional Timor-Leste nian. Ho rute foun sira ba Australia neebe sei hahú mos iha fulan-dezembru no ho nasaun nia adezaun ofisial iminente ba ASEAN, haforsa ligasaun aerea ho parseiru xave sira hanesan Xina nee fundamental. Prezidensia nafatin komprometidu atu buka parseiru estratejiku sira neebe bele loke potensia ekonomiku no kria prosperidade duradoura ba povu Timor Leste.
Jornalista: Emerenciana Pinto
Editora: Carme Ximenes
