DILI, STLTIMORLESTE.com – Prezidente Republika (PR), Jose Ramos Horta hatete, durante iha Japaun hasoru malu ho Primeiru Ministru Japaun hanesan reuniaun bilateral, hodi hametin lasu amizade entre rai rua iha futuru.
Xefe Estadu hatoo kestaun nee ba Jornalista sira, bainhira remata vizita Estadu ba Japaun fila hikas mai Timor Leste, iha Aeroportu Internasional Nicolau Lobato, Komoro, Dili, Sesta (9/08/2025).
“Ho Primeiru Ministru iha 26 enkontru naruk hahu 30 ka 40 minutu reinuan bilateral partisipasaun husi Ministru Negosiu Estranjeiru no Kooperasaun, Bendito Freitas ho Visi Ministru Parlamentares, iha hau nia delegasaun mak enkontru ho Primeiru Ministru Japones, uluk tinan lubuk ida nia mai nee bainhira nia asume hanesan Ministru Negosiu Estranjeiru mai tiha ona TL, Uluk nia hanesan Ministru Negosiu Estranjeiru hau hasoru nia relasaun diak metin,” dehan Prezidente Republika, Horta.
Nia afirma, Japaun iha inisiativa neebe koalia tiha ona ho Ministeriu Interior para fo apoiu ba parte seguransa maritima prosesu nee lao dadaun ona, no relasaun Timor -Leste ho Japaun metin liu tan.
“Ba oin ita sei kontinua dezenvolve,” dehan nia.
Prezidente Republika, Jose Ramos-l Horta no Primeiru Ministru Japaun nian, Ishiba Shigeru, konsolida parseria estratejika entre Timor-Leste no Japaun durante almosu servisu ofisial ida neebe importante tebes iha.
Lider nain rua halao diskusaun substantiva ho objetivu atu hametin kooperasaun bilateral iha setor xave sira, inkluindu dezenvolvimentu ekonomiku, enerjia renovavel no investimentu, no iha tempu hanesan, aborda mos kestaun krítika sira kona-ba pas no seguransa rejional.
Enkontru nee haree fila-fali ba kooperasaun forte durante dekada rua resin, hodi destaka ba apoiu esensial husi Japaun neebe too ona total liu milhau US$438. Apoiu ida-nee importante tebes ba projetu infraestrutura boot sira hanesan terminal pasajeiru foun Aeroportu Internasional Dili nian, modernizasaun Ospital Nasional Guido Valadares, no haforsa Radio e Televisão de Timor Leste, Empresa Publica (RTTL, EP). Diskusaun nee kobre mos investimentu privadu signifikativu husi kompañia Japaun nian hanesan Tsuneishi Shipping no INPEX, hodi subliña evolusaun ba parseria ida neebe luan hodi promove kreximentu sustentavel.
Iha domíniu ba defeza no seguransa, enkontru nee reafirma kompromisu Japaun nian atu haforsa kapasidade seguransa Timor-Leste nian liuhusi ninia kuadru Asistensia Seguransa Ofisial (OSA), kompromisu ida neebe foin daudaun nee hatudu liuhusi vizita ro naval Japaun nian, OHSUMI, ba portu Dili.
Lider nain rua remata ho kompromisu mutua atu aselera dezenvolvimentu komun no haforsa papel Timor-Leste nian nuudar parseiru konfiavel no estavel ba Japaun iha Sudeste Aziatiku, hodi konsolida vizaun komun ida ba rejiaun ida neebe prosperu no dame.
Jornalista: Emerenciana Pinto
Editora: Carme Ximenes
