DILI, STLTIMORLESTE.com – Prezidente Republika (PR), Jose Ramos Horta hatoo agradesimentu ba Universidade do Minho, neebe atribui títulu Doutor Honoris ba nia.
Prezidente Republika, Jose Ramos Horta hatoo agradesimentu klean, hodi dedika onra nee ba povu Timoroan tomak. Maibe, Prezidente nian muda nia foku ba asuntu global, hodi uza plataforma nee atu lamenta nonok no ipokrizia husi mundu osidental iha jenosídiu iha Gaza nia oin, hodi akuza ho padraun duplu.
Iha serimonia istorika no solene ida, Prezidente Republika simu grau Doutor Honoris Causa husi Universidade Minho.
Eventu nee, neebe halao iha majestozu Salaun Medieval universidade nian, konta ho prezensa hosi Prezidente Republika Portuges, Marcelo Rebelo de Sousa, hamutuk ho Reitor Universidade Minho, Rui Vieira de Castro, no distinta asembleia ida hosi akademiku sira, diplomata, no dignatariu sira. Onra nee rekonese líder Timoroan nia kontribuisaun klean ba pas no diplomasia mundial.
Rekomendasaun akademika universidade Minho nian elojia Prezidente Ramos Horta nuudar figura uniku iha diplomasia internasional neebe nia moris kahur-malu ho istoria rasik hosi autodeterminasaun Timor-Leste nian. Profesora Isabel Estrada Carvalhais, neebe nuudar madrina doutoramentu nian, elojia Prezidente nuudar arkitetu ba ponte sira entre kultura no sivilizasaun no umanista global ida. Sitasaun ofisial rekonese nia kontribuisaun estraordinariu ba defeza direitus umanus, autodeterminasaun povu nian, no konsolidasaun pas no demokrasia, hodi selebra nia nuudar símbolu internasional ba rezistensia pasífika no dialogu.
Iha diskursu agradesimentu neebe makaas no pesoal tebes, Prezidente Ramos-Horta hatoo agradesimentu klean, hodi dedika onra nee ba povu Timoroan tomak. Maibe, Laureadu Premiu Nobel Pas nian muda nia foku ba asuntu global, hodi uza plataforma nee atu lamenta nonook no ipokrizia hosi mundu osidental iha jenosídiu iha Gaza nia oin, hodi akuza ho padraun duplu. Prezidente deklara ho laran-susar, Hau asiste destrusaun povu ida-nian diretamente, iha mundu ida neebe parese lakon ona nia konsiensia moral, hodi apela ba korajen polítika no kompaixaun umana nuudar fundasaun ba lideransa loos.
Hodi taka serimonia, Prezidente Republika Portuges, Marcelo Rebelo de Sousa, deklara loron nee nuudar istoriku, hodi deskreve Prezidente Ramos-Horta nuudar doutor ida ho intelijensia neebe nabilan no prinsípiu neebe metin.
Prezidente Marcelo Sousa selebra líder Timoroan nia koerensia no korajen moral, hodi konklui katak doutoramentu nee istoriku laos deit tanba mane neebe hetan omenajen, maibe mos tanba povu maun-alin neebe nia reprezenta povu Timor-Leste, ezemplu dignidade no esperansa nian.
Jornalista: Emerenciana Pinto
Editora:Carme Ximenes
