DILI, STLTIMORLESTE.com – Prezidente Republika (PR), Jose Ramos Horta hatoo kondolensia ba falesimentu profesor Antonio Pinto Barbedo de Magalhães.
Prezidente Republika hatoo sentidu kondolensia profunda ba falesimentu Profesor Antonio Pinto Barbedo de Magalhães, figura importante ida iha akademia Português nian no lian ida neebe mak forte liu hodi defende kauza Timoroan nian durante tinan difísil sira iha okupasaun Indonezia nian.
Iha karta kondolensia neebe diriji ba Sra. Inês Monteiro Barbedo de Magalhães, Profesor Dr. Antonio Pinto Barbedo de Magalhães nia oan-feto, iha loron 29 fulan Maiu tinan 2025, Prezidente hatoo sentidu kondolensia ba Profesor Barbedo de Magalhães nia família, Universidade Porto, no nia belun sira hotu, hodi fo onra ba nia memoria ho respeitu no gratidaun.
Profesor Barbedo de Magalhães dedika dekada barak husi nia moris ho matenek, korajen, no jenerozidade hodi promove direitu povu Timor Leste nian, tantu akademika no sívika, iha Portugal no internasionalmente.
Nia ligasaun ba ho Timor Leste hahu kedas husi tinan 1974, bainhira nia koordeena projetu vizionariu ida ba restruturasaun edukasaun iha Dili iha tempu neebe independensia sei dook.
Durante nia kareira, Profesor Barbedo de Magalhães mantein ninia kompromisu inkansavel hodi koordena Loron Timor nian iha Universidade Porto, hodi halao knaar nuudar membru Komisaun ba Direitu Povu Maubere no Asosiasaun ba Pas no Justisa Timor Leste.
Liu husi ninia publikasaun livru no dokumentu fundamental sira kona-ba istoria polítika Timor Leste nian, nia kontribui signifikativamente hodi hasae konsensia internasional kona-ba lejitimidade no urjensia luta Timor-Leste nian ba independensia.
“Timor Leste sei la haluha nia lian neebe amigavel no apoiu, no sei perpetua nia naran nuudar defensor boot ida ba ita-nia dignidade no autodeterminasaun.” Katak PR Horta.
Prezidente Ramos Horta fo hanoin kona-ba liafuan sira husi laureadu Nobel ba Pas Elie Wiesel Kontrariu husi hadomi laos odiu, maibe indiferensia, nota katak Profesor Barbedo de Magalhães sempre kontrariu husi indiferensia.
(eme)
